Kan hruaitute leh mipuite'n báng tura Min tih loh vangin ka báng lo - Thanzara

PWD minister Lal Thanzara chuan, minister aṭanga báng turin a inpeih reng thu a sawi a, "Kan hruaitute leh min thlangtu mipuite'n báng tura min tih loh avangin ka báng lo a ni," a ti.

Lal Thanzara hian nimin khan Congress Bhavan-ah thu a sawi a; Tuirini lei a chim hnuah mawhphurtua inngaiin Chief Minister mawhphurhna la mektu Home Minister hnenah bàn mai ṭha a tih thu a hrilh tih sawiin, "Ani chuan báng lo tur leh a ṭul chuan an ngaihtuah mai tur thu min hrilh. Chu bakah, Congress Legislature Party Secretary pawh ka bia a, kan President leh member-te'n ka bàn ṭha an tih leh tih loh zawt turin ka hrilh a, anni chuan ka bàn ṭul an ti lo a ni," a ti a, an hruaitute leh amah thlangtute'n báng tura an tih loh avangin a bàn tak loh thu a sawi a ni.

Tuirini lei chim chungchangah thiamthu sawi tur an neih loh thu sawiin PWD Minister chuan, "Kan vanduai a ni mai. Chumi khami tia sawi tur pawh a awm lo. Lei chim hnuah Home Minister hoa minister awm remchangte bakah, dan lam hria Law Commission Chairman leh Deputy Speaker-te kan ṭhutkhawm ṭumin, lei chim chungchang chhui turin Aizawl DC kaihhruaina hnuaiah magisterial inquiry din a ni. Chuvangin, ka tan lei chim chhan tur a rin leh a chhan leh vang sawi vak vak a rem tawh lo," a ti.

PWD Minister chuan, lei chim vanga nunna chán an awm chu pawi a ti tak zet tih sawiin, "Health department lamin programme kan lo siam lâwk tawh avangin mitthi vuinaah pawh ka kal thei lo a ni. Mahse, PWD E-in-C leh a hote mitthi vuinaa awm turin ka ti a, ka aiawhin pawi an tih thu an sawi bakah, ràlnate an pe a ni," a ti a; lei chim vanga hliam pawh mi hriat lem loa a kan tawh thu a sawi.

Lal Thanzara chuan, Tuirini lei chim chu hmâr tlangdung mipuiin châkkhai an lakna kawng ber a nih thu sawiin, "Fûr ruahtui a thlen hmaa lei siam a nih loh chuan harsatna an tâwk dawn a. Chuvangin, PWD hotute'n lei chimna bul hnaiah lei tâwi zawk dawhna tur an zawng a, ft. 160-a seia dawhna tur an hmu a, dawh vat a ni thei dawnin kan hria. Fûr ruahtui tlak hma ngeia lei dawh hman kan tum. Lei ṭhiah tawh hmanraw hluite hman tum a ni a, sum mamawh angte pawh Finance Minister-in a ngaihtuah dawn," a ti.

MNF-te'n vanduaina a thlen vanga sawi tur an nei chu a lawmpui zawk tih sawiin Lal Thanzara chuan, "An sorkar chhungin vanduaina an tâwk ve a, keimahni ang thoin. Lei dawh hi khawvel hmun dangah pawh a chim ve zeuh zeuh a, keini pawhin vanduaina kan tâwk ve a ni mai," a ti.

PWD Minister chuan, Tuirini lei chim hmain Congress sorkar hnuaiah lei ṭum ruk a chim tawh thu an sawi tih sawiin, lei chim chhan hrang hrangte a tarlang.

PWD-in lei chim chhan a sawifiah dan
1) December 7, 2006-a Sihhmuia Tlawng lei a chim chhan chu lei part ṭhenkhat miin an rûkbo avangin a chakna tur angin lei a chak lo a, Tantia Contructions trailer hita­chi-in excavator phurin a zawh laiin a chim.
2) October 31, 2014-a Sihhmuia Tlawng lei a chim chhan chu lei part rûkbo a nih vang tho a ni a, a zawh tawk aia rit phur SL Infracon truck bitumen premix phurin a zawh laiin a chim.
3) December 8, 2014-a Sihhmuia Tlawng lei vêk a chim chhan chu October 31, 2014-a chim, dawh ṭhat a nih laiin, dawh kai hma hreta chetsual palh vang liau liauin a dawhkaina tur ber norsing luiah a tla palh a, lei a chim.
4) December 13, 2014-a Chhimtuipui Darzokaia jeepable suspension bridge a chim chhan chu lei dawh a nih mek lai, 85% vel thawh zawh tawh a nih laiin a pawh nghehna hruipui a dâwk a, lei chim phah. Mi pakhat a thi a, mi pakua an hliam.
5) December 12, 2015-a Sihhmuia Tlawng lei a chim chhan chu, leiin a zah tawk aia rit phur truck ke 12 nei over load-in a zawh avang a ni. Driver a thi a, handyman a hliam.
6) May 22, 2016-a Bairabia Tlawng lei a chim chhan chu, lei dawh a nih lai mekin, a span pali zinga pakhat chu concrete chhun zawh tawh a ni a, mahse, concrete chu set ṭhat hmain a dinna ber tui lianin a la a, a chim a ni.