KHAWTHLIR

Exhibition khar
Lawngtlaia Horticulture department leh Lawngtlai Florist Association-te'n LADC Conference Hall-a February 14, 2018 aṭanga 'Horticulture Exhibition 2018' an buatsaih chu nimin khan khar a ni a, Lawngtlai DC Dr Arun T-in a hmanpui. Exhibition-ah hian item chi hrang 35 pho chhuah a ni a, Rs. 60,000 man vel hralh a ni.

Mi 1,200 admit
January 2018 chhung khan Aizawl Civil Hospital-ah mi 30,245 an inentir a, mi 1,200 admit an ni. Nau piang 384 an awm laiin, mitthi 55 an awm. Damlo 260 chu Mizoram páwn lama enkawl tura thawn (refer) an ni.

Mizoram DGP
Mizoram Director General of Police (DGP) atan Balaji Srivastava ruat thar a ni. Balaji Srivastava hi IPS officer, 1988 batch, AGMUT cadre a ni.

Sava veh lo turin ngen
Ramngaw leh nungcha humhalhtu pawl hrang hrang - Bio-diversity and Nature Conservation Network, Mizoram Environment & Forests Consultative Forum, Association for Environmental Preservation, Mizo Academy of Sciences, Save Environment Association leh Save Mizoram Birds Joint Action Committee-te chu chuan, sava no neih a hun leh dawn tak avangin, hmanraw hrang hrang hmanga sava veh ṭhinte chu ti tawh lo turin an ngen.

Cultural Day
Aizawl City College Joint Students' Union leh MSU sub-headquarters, Farkawn chuan, nimin khan Farkawnah Cultural Day an hmang. Cultural Day-ah hian Aizawla college hrang hrang aṭangin zirlai 200 vel leh Farkawn khaw mipui an tel a ni.

Election workshop
Mamit Election Branch under Systematic Voters Education and Electoral Participation (SVEEP) chuan, Ningani zan khan Siamliana Hall, Mamitah 'Workshop on Clean Election' an buatsaih a, Mamit additional DC Jacob Lalawmpuia'n a hmanpui. Workshop-ah hian Mamit khawpuia MHIP member-te an tel a ni.