Hmun hrang hrangah KṬP Day lawm

Nimin, February 16 kha KṬP Day a ni a, Mizoram hmun hrang hrangah leh Mizoram páwna KṬP dinna hmunahte kawng hrang hranga lawm a ni.

KṬP Day hman dan turah hian Central KṬP chuan branch tinte chu an remchan dan anga lawm tur leh, khawtlang leh mi dangte tana thil ṭha tihna hun atana hmang turin a chah a; thisen pekna hun atan te, ṭanpui ngaite ṭanpuina atan te, biak-in tihfai nan leh khawtlang tana thawhna hun atante hmang turin a ngen a ni.

Central KṬP ngenna angin, KṬP branch tam tak chuan nimin khan an khawtlang tan hna an thawk. Mamit khawpuia KṬP branch hrang hrangte chuan an veng chhung khawlai leh biak-in leh a chhehvelte tifaiin an hnatlang a; Mamit Dinthar Branch chuan Mamit District Hospital-a damlote hnenah bawnghnute leh artui an sem.

Lawngtlai Bial KṬP chuan KṬP Day lawm nan blood donation camp an huaihawt a, Lawngtlai District Hospital tan an member mipa 15 leh hmeichhia pangate'n thisen unit 20 an pe. Mission Veng Branch chuan KṬP Day pualin nizan khan Charity Ride hun hmangin, Thutak Nunpuitu Team (TNT), Muanna Veng an tlawh a, ṭanpuina sum eng emaw zat an hlân.

Tlabung Zodin Branch chuan Mizorama phár enkawlna damdawi-in awm chhun, Leprosy Hospi­tal, Tlabungah ṭan­puina sum an pe a, dam­dawi-in leh a chhehvel tifaiin an hnatlang nghal a ni. Zan lama intihhlimna hun hmang an awm nual bawk.

Kristian Ṭhalai Pawl hi November 27, 1953-ah Provisional Committee siam niin, office bearer-te pawh ruat a ni a; chu chu Synod Standing Committee (SCC)-ah an thlen a, SCC chuan Feb­ruary 16, 1954-ah a remti. Feb 16, 1954 chu Synod Inkhawmpuiin KṬP din ni atan a pawm ta a ni.