Project Himna hnuaia hmalaknate sawiho

Nimin khan Aizawl DC Dr A Muthamma hoin DC conference hall-ah 'Project Himna–Mizoram Against Drugs, Alcohol and Tobacco' (MADAT) hnuaia hmalaknate sawiho a ni.

Aizawl Bawrhsap chuan, Project Himna-MADAT chu Mizoram ṭhangtharte ruih theih thil laka an fihlim theihna tura hmanraw pawimawh tak a nih ngei a beisei thu a sawi a, "Analytical report aṭanga zirlai naupang tam takte'n ruihhlo ṭhat lohna leh ruihhlo do kawnga zirtirna an dawng tlem anga lang hi a pawi hle. Himna-MADAT hmangin zirlai naupangte thleng thei tur ruihhlo dona inzirtirna ṭha Mizoramin kan mamawhzia a lang chiang hle," a ti.

Meeting-ah hian, Research and Documentation Sub-Committee buatsaih Analytical Study report thlir a ni a; Module Preparation team leader Zochhuani'n report behchhana Study Module (Activity textbook) an buatsaih chu Committee hmaah a pharh. Module hi peih a nih hunah sikul hrang hranga zir tura ruahman a ni ang.

Project hnuaia naupangte zirtirna atan documentary film 'Duhthlanna' tih an siam tawh a, short film dang buatsaih leh tura hmalak a ni.

June 21, 2017 khan NEDP hnuaiah sorkarin ruih theih thil laka ṭhalaite an fihlim theihna tur ruahmanna a duang a; project hi Aizawl DC pisa kaltlanga pilot project siam niin, upper primary school (middle school) chin chung lam a huam. Project Himna-MADAT hi Aizawl district chhunga sikul thlan bikteah kalpui a ni.

Project hmalakna zingah, naupang zingah ruih theih thil vanga an chunga thil ṭha lo thleng thei hrang hrang inhrilhhriatna neih te, sikula Anti-Tobacco/Anti-Drug Abuse Club din te, Art Competition buatsaih te, pamphlet, poster, sticker leh complaint board siam te, zirna-in bul hnaia vaihhlo leh ruih theih thil reng reng zawrh phal lo tura hmalak te, public education campaign buatsaihte leh zirlaite hriatna tizau tura hospital tlawh hun siamte a tel.