Conress sorkar lei dawhah a fail ṭhak - K Sangṭhuama

MNF MLA K SanGṭhuama chuan, Congress kaihhruai sorkar chu lei (bridge) dawhah a hlawhchham ṭhak niin a sawi a; Congress sorkar hnuaiah ram hmasawnna a awm loh avangin mipui an beidawng niin a sawi bawk.

Nimina Aizawl West-I chhung, Lungverh-a MNF zawm thar lawm luhna inkhawmah K Sangṭhuama chuan, tun hnaia kum li chhungin Mizoramah lei vawi ruk a chim a, mi pathumin an thih phah tih sawiin, rapthlak a tih thu a sawi a, "Sorkar hian thil a tih reng rengin tih tak takin a ti lo a ni. Congress sorkar hi lei dawhah a fail ṭhak a ni. Khawvel hmun dangah kum li chhunga lei paruk chim hmuh tur a la awm ngai lo," a ti.

K Sangṭhuama chuan, kum 10 chhung MNF an sorkar laiin lei 10 an dawh a, pakhatmah a chim lo tih sawiin, "Tun Congress term-a lei paruk ngawt mai chim hian Congress tlak turzia a tilang a ni. Sorkar hian lei dawh chungchangah ngaihtuahna thar a put a ngai," a ti a; sorkarin lei a dawh reng rengin bailey bridge hmang tawh loin, senso tam zawk mah se, RCC chauhin siam ṭhin tawh se ṭha a tih thu a sawi.