Doctor-te leh tlawmngai pawlte'n khauh zawka inkharkhip an duh

Mizoramah Covid-19 hripui vei hmuh chhuah belh zel a nih avangin Mizorama tlawmngai pawlte leh doctor-te chuan vantlanga inkai chhâwn (community spread) a thlen loh nan khauh zawka inkharkhip an duh.

Vanglaini palai zawhna chhangin Mizoram Government Doctor Association (MGDA) president Dr Chawngthanchhunga chuan, doctor-te chuan khauh zawka inkharkhip kalpui leh an duh thu a sawi. Doctor-te chuan an duh dan hi vawiina Chief Minister hoa inràwnkhawmnaah an thlen dawn a ni.

Dr Chawngthanchhunga chuan, Covid-19 vei hmuh chhuah belh an nih tâk avang leh home quarantine thlenga kái an awm tâk avangin fimkhur lehzual a pawimawh thu a sawi a, "Doctor lam chuan chawlhkar hnih tal khauh zawka inkharkhip kalpui leh kan duh a ni," a ti.

NGO Coordination Committee chairman Vanlalruata, CYMA president chuan Vanglaini palai zawhna chhángin, khauh zawka inkhàrkhip kalpui leh an duh thu a sawi.

Vanlalruata chuan, Whatsapp hmangtea an inràwn khawm tawh thu sawiin, "Kan dinhmun enin, khauh zawka inkharkhip leh hi ṭha kan ti a, Chief Minister hoa meeting-ah pawh kan thlen ang," a ti.