Ni khatah sample 1,000 chuang endik thei turin buaipui mek a ni - Health Minister

Health & Family Welfare (HFW) minister Dr R Lal­thangliana chuan June 6, Inrinni khan a pisaah mipui hnena thuchah sawiin, ZMC-ah ni khatah swab sample 1,000 chuang endik theih tura buaipui mek a nih thu a sawi. Covid-19 hripui chu tualchhunga inkai darh (community spread) a hlauhawm avangin fimkhur tur leh sorkarin ruahmanna a siamte ṭha taka zâwm turin mipui a sáwm nghal.

Health Minister chuan, ZMC-ah ni khatah sample 1,000 chuang endik theih thuai tura buaipui mek a nih thu sawiin, "Swab sample test theihna khawl PCR tlukpui Trunat Machine, Lunglei Civil Hospital-a dah pawh ICMR-in a pawmpui tawh a, rei lo têah test a tih ṭan theih dawn," a ti a; Lengpui Airport-a thlawhtheihna hmanga rawn lutte dawng­sawng tura inbuat­saihna chu India rama airport zinga a ti ṭha ber pawl an nih thu a sawi.

R Lalthangliana chuan, Covid-19 veite zinga 80% chu natna serious lo ‘mild case’ an nih thu sawiin, "Oxygen leh ventilator an mamawh lo a, enkawl nan ZMC kher a ngai lo. A enkawlna tur district hrang hrangah covid care centre (CCC) leh dedicated Covid health centre (DCHC) ruahman vek tawh a ni. Covid-19 vei hmuh belh zel a nih pawhin CCC leh DCHC hi ruahman belh zel a ni ang,'' a ti.

Mizoramin thla hnih leh a chanve vel hnuah Covid-19 vei a neih thu sawiin Minister chuan, "Natna vei hmuh tharte hi a naupang ber kum 19 leh a upa ber kum 45 a ni a, state dang aṭanga tun hnaia lo haw, quarantine lai vek an ni a, ngaihtuahawm an awm rih lo," a ti a; himna tura sorkarin zawm tur a siamte zâwm lo chu pawisa chawitir bakah lung-ina tàntir hial theih a nih thu a sawi.

Dr R Lalthangliana chuan, indem leh inmawhpuh hun a nih loh thu sawiin, "Tun hun hi kan fimkhur zual a pawimawh lai ber a nih avangin mi tinte'n kan himna tur a ni tih hriain sorkarin ruahmanna a siamte ṭha takin i zâwm ang u. Hrehawm deuh mahse hun rei lote chhung thu awih taka kan ṭan tlàn chuan he natna hi kan hneh ngei ang," a ti.

Hripui léngin mihring rilru a ṭha lo zawnga a nghawng theih thu sawiin Minister chuan, "Zaidawhna, inlainat tawnna, inhriatthiam tawnnate mahni inveng fimkhur sia neih a ngai," a ti a; tute pawh Covid-19 kai thei vek an nih avangin, natna vei tawhte chu diriam leh dem ngawt lo a, a ṭulna hmunah chuan hlau leh thinhrik loa enkawl a, infuih tawna inchhawmdawl tawn a ṭul thu a sawi.