District-a gas harsatna sutkian nan FCSCA-in support price a ruahman

Mizoram district hrang hranga gas phurh hna thawktu carrying contractor-in a thawh ṭhat tawk loh avangin district hrang hrangah mipuiin gas-ah harsatna an tâwk. Mipui harsatna zutkian a nih theih nan Food, Civil Supplies and Consumer Affairs department chuan support price pe turin ruahmanna an siam.

FCSCA department hotute chuan, district hrang hrangah ei rawngbawlna gas chak zawka phurh a nih theih nan support price ruahman ni mah se, thutlukna chiang tak a la awm lo tih an sawi a; gas phurh man chu cylinder pakhat zelah kilometre bithliahin support price pek tur a ni a, phurh man (rate) erawh sorkarin a ruahman dawn niin an sawi bawk.

Mualkhang Gas Bottling Plant leh Borkhola, Assam Bottling Plant chu Mizoram gas mamawh lakna pui ber a ni a; Mualkhang Bottling Plant chu Aizawl khawpui páwn lamin gas an lakna ber a ni.

Supply deparment hotute chuan, tun hnaia eirawngbawlna gas harsat chhan chu a phurh chhuah kawngah harsatna a awm vang a nih thu an sawi. Mualkhang aṭanga gas phurtu contractor-in a phurh man an chhan hniam avangin tun hnaiah gas an phur ṭha lo a, chu chuan Aizawl tih loh khaw danga mipuiteah harsatna a thlen ta a ni.

Harsatna sukiang turin theihtawp chhuah a nih thu sawiin FCSCA hotute chuan, department-in truck thar pathum a neih chu gas phurh nana hman theih turin MIZOFED kaltlangin IOC-ah dil mek a nih thu an sawi.

FCSCA hotute sawi danin, tun hnaia gas harsat zualna hmunte chu - Lunglei, Siaha, Champhai, Serchhip leh Mamit district-te a ni a, chu'ngte chu Mualkhang Bottling Plant-in a châwm vek an ni.

District danga mite'n Mualkhang chauh ni lo, Borkhola aṭang pawha gas an lak theih nan Supply department hotute chuan IOC an dâwr mek a ni.