Upper Khatla MG Road-ah Lei dawh hna ṭan a ni
Upper Khatla, Aizawla Mahatma Gandhi Road-a Bible House bula kawng chhuat bal laiah lei (bridge) ṭha zawk dawh tum a ni a, February 16, 2018 zan khan hna thawh ṭan a ni. Hei vang hian he kawngah hian lirthei tlân tlang theih a ni lo.
PWD executive engineer (Aizawl Road South Division) David Sapzova sawi danin, MG Road-a lei dawh tur hi built up steel girder bridge a ni a; chu chu a ban leh ruhrel thîr, a chhuat cement concrete a ni. BSG bridge ang hi Aizawl by-pass road-a Chite lui chungah pawh dawn a ni tawh.
Lei dawh hna hi thla li chhunga zawh hman tum a ni a, lei dawh hi Lalthlamuana'n a enkawl dawn a, Bluu Hill-te'n an dawh dawn nia thu dawn a ni. Lei dawhna hmanruate chu Guwahati aṭangin rawn phurh chhoh mek niin David Sapzova chuan a sawi.
Lei dawh hna ṭan a nih avang hian MG Road-ah hian lirthei eng chi pawh tlan tlang theih a ni lo a; lei dawhna turin kawng chhuat laih chah niin, lei ban phunna tur laih tawh a ni.
MG Road-a lei dawh hna thawh ṭan hi February 17, Inrinni zing khan bialtu MLA Vanlalzawma'n a tlawh a; MG Road chu kawngpui pawimawh a nih avangin mipui leh lirthei tana harsatna siam rei lo thei ang bera thawk zo thuai turin lei dawh hna thawktute a chah. Kawng siam chhungin mipui leh lirthei tan kal theih a nih dawn loh avangin dawhthei taka nghak turin mipui a ngen bawk.