Bairabi-ah ILP endik loh avangin ZPM ṭhalaite'n sorkar an dem

Ṭangrual pawl, Zoram Peoples' Movement (ZPM) ṭhalai hruaitute chuan, Bairabi rel chawlhhmunah tun thlengin hnam dangte inner line permit (ILP) enfiah (check) a la ni lo tih an sawi a; "Heti taka hnam himna vei lo sorkar kan nei hi a thinrimthlak a, Mizoram sorkar hi kan dem tak zet a ni," an ti.

ZPM ṭhalai hruaitute hian February 17, Inrinni khan Aizawl Press Club-ah thuthar thehdarhtute an kâwm a; an sawi danin, ZPM pian hma, kum 2016-ah MPC leh ZNP ṭhalaite'n Bairabi-a rêl chawlhmun an tlawhnaah, state páwn aṭangin rêl hmangin hnam dang eng emaw zat Mizoramah an rawn lut a, mahse, hnam dangte chu ILP endiksak an ni ngai lo tih an hmu a ni.

ILP check a ni ngai lo tih an puan hnuah Kolasib DC-in Bairabi rel station-ah ILP counter a hawng nghal a; ILP counter-ah chuan a takin hna thawh a nih leh nih loh MPC leh ZNP ṭhalaite'n an enfiah leh a, ILP enfiah a ni chuang lo tih an hmu a ni. ILP check a nih miau loh avangin ILP counter pawh dawrtu nei loa a ruah thu an tlangaupui leh nghal niin an sawi.

Bairabi-a rel chawlhhmun chu tun hnaiah ZPM ṭhalaiin an enfiah tih sawiin ZPM ṭhalai hruaitu Lalmuanpuia Punte chuan, "Rel station-ah rel lo thlen laiin ILP check a la ni ta chuang lo tih kan zuk hre leh. Heti taka hnam himna vei lo sorkar kan nei hi a thinrimthlak a, Mizoram sorkar hi kan dem tak zet a ni," a ti.

Lalmuanpuia Punte chuan, "ZPM ṭhalai chuan a rang thei ang berin Bairabi rel station-a rel passenger-te ILP check thuai tur leh state pawn aṭanga thlai lo lutte a hrisel leh hrisel loh endikna siam thuai turin Mizoram sorkar kan phût a ni," a ti a; rel hmanga state pawn aṭanga thlai lak luhte chu mipui tan a him leh him lih enfiah turin sorkar an phût tih a sawi.

ZPM ṭhalai hruaitute sawi danin, Mizoram páwn aṭangin thlai lak luh a ni ṭhin a, mahse, state pawn aṭanga thlai lak luhte chu a him leh him loh te, mihring tana hlauhawm thei thil a tel leh telh lohte enfiah a ni ngai lo. Vaihoin an thlai chîn leh hralh tur an enkawlnaah hlo, mihring tana hlauhawm thei an hmang nasa nia sawiin, "Hei vang hi a ni mahna, Mizote'n cancer kan vei nasat em em chhan," an ti.

Kumin January 24 leh January 31 khan Bairabi YMA-in Bairabi bazar nía zawrh tur thlai hrisel lo, state páwn aṭanga phurh luh tam tham tak an mansak thu an tualchhung chanchinbuah tarlan a nih thu, ZPM hruaitute chuan an sawi.

ZPM ṭhalai chuan, "Kumin kum tawpa inthlanpui kan neih turah hian Mizo hnam himna, mipui hriselna, lo neitute hmasawnna tur leh ṭhalaite hmakhaw ngaihsaktu tur ZPM a sorkar ngei theih nan mipui thlawpna leh puihna kan ngen tak meuh a ni," an ti.