KHAWTHLIR

Tân khawpui chei
Hmanlaia Mizo pi leh pute'n lasite tuallênna tláng nia an ngaih, Ṭân lalnu Ṭântinchhingi khawpui Ṭân cheina chi khat atana Chawngtlai khuain Mizo pa in leh thing leilâwn an siam chu February 16, Zirtawpni khan PC Khawhluna'n a hawng. Zopa in hi a dung ft .24 leh a vâng ft. 15-a zaua sak niin, a sak nan thâ 407 an sêng a; thing leilâwn chu ft. 250-a sei niin, a siam nan thâ 97 an sêng thung.

Special clinic
Indian Medical Association (IMA) Mizoram Branch chuan an khaw enkawl, Nghalchawmah February 16, 2018 khan special clinic an buatsaih. IMA special clinic-ah hian mi 211 an inentir a, an mamawh ang damdawite a thlawnin an pe. Clinic-ah hian doctor pakua leh anmahni puitute an thawk chhuak a ni.

NHRC-in pawm
PRISM chuan, Chief Minister vengtute'n Serkhan khuaah Lalbiakzuala, Sihphir an sawisak chungchang National Human Rights Commission (NHRC)- an thlen chu NHRC-in a pawm a, case a ziak lut niin an tarlang. PRISM tarlan danin, Chief Minister vengtute'n Lalbiakzuala an sawisak chungchangah hian NHRC-in case no. 18,768 an ziak lut a ni.

Thisen pe
KṬP Day pualin Inrinni khan Model Veng Banch KṬP-in Aizawl Civil Hospital tan thisen unit 42 an pe a, a petute mipa 37 leh hmeichhia panga an ni. Khatla North Branch KṬP pawhin Synod Hospital tan thisen unit 23 an pe a, a petute mipa 20 leh hmeichhia pathum an ni. Inrinni vek khan Aizawl Civil Hospital Blood Bank-ah individual voluntary donor 17 an awm bawk.