MNYF-in Tuirial kawng blacktop chhia an ti

Mizo National Youth Front (MNYF)-te chuan February 17, Inrinni khan NH-54, Zemabawk-Tuirial inkar kawng siam mek a hmunah an enfiah a; kawng blacktop tawhte chu a chhe hle niin an tarlang.

Kawng enfiahnaah hian MNYF vice president Lalrem­ruata Chhangte leh treasurer Lalzahawma Khiangte bakah hruaitu dangte an kal a; thu­chhuah siam nghalin, "He kawng blacktop hi a chhe hle a, hmun ṭhenkhatah phei chuan kawng khuar leivûnga hnawhin an blacktop hnan tawp a ni. Blacktop ṭhenkhat chu kut hmang pawha phawh hlawk hlawk theih a ni," an ti.

MNF ṭhalaite chuan, Zema­bawk-Tuirial inkar kawng chu thingtlang aṭanga Aizawl luhka pawimawh leh lûn ber zinga mi a ni tih sawiin, "Aizawl khaw chhung chin ṭha pangngai taka siam a, Aizawl páwn zawng a nih dan tur anga siam loh ni a lang hi thingtlang mite hmuhsitna lian tak a ni," an ti. Tuirial kawng chu hun rei tak chhung chhe tawh a nih avangin mipuiin a ṭhat hun an nghakhlel tih sawiin, ṭha taka siam zo thuai turin siamtute an chah.

MNYF chuan, PWD Minister chu NH-54 kawng siam mekah chanpual (share) a nei em ni, tih chu an zawhna a nih thu an sawi bawk.

MNF Tuichang North Block-te pawhin Inrinni vek khan Khawzawl mipui chawmtu tur tui pump siam hna thawh mekna, Tuichang lui a hmunah an enfiah bawk a; "Khawzawl mipui châwmtu tur Tuichang lui pump mek hi a hawn tura tihah hawn hman a ni lo hi Tuichang-N Block MNF chuan pawi a ti tak zet a, a rang thei ang ber a hawng turin Mizoram sorkar kan phût a ni," an ti.