Damdawi-in fai lawmman dawn lawm

Bukpui Primary Health Centre (PHC) chuan damdawi-in fai inelna, Kayakalp hnuaia Kolasib district-a PHC faia thlan an nih chu February 16, 2018 khan an lawm a, bialtu MLA Hmingdailova Khiangte-in a hmanpui.

Hmingdailova Khiangte chuan, Bukpui khawtlangin a khua leh damdawi-in faina kawnga hming an chher chu thil chhinchhiah tlak a nih thu sawiin, "Khaw dang tana entawn tlak tak a ni," a ti a; Bukpui khawtlang hruaitute leh mipuite'n thawhhona ṭha tak an nei chu chhunzawm zel turin a chah.

Kolasib chief medical officer Dr Lalhlimpuia pawhin thu sawiin, hriselna kawngah Mizote'n ṭan an lak a hun tak zet tih a sawi a, "AIDS, cancer, thisen sang, zunthlum leh natna dangte'n Mizote min chîm buai nasa em em a, kan khawsa zia, nunphungte kan uluk a, zûk leh hmuama kan insum theih a ngai a ni," a ti.

Bukpui PHC hi kum 2016 khan Kayakalp hnuaia inelnaah pahnihna an ni a; tun dinhmunah medical officer pakhat leh staff nurse pahnih an awm a, khum 10 an nei a ni.