South-II MUP-in khawmpui an hmang

Mizoram Upa Pawl (MUP) Aizawl South-II Area chuan Inrinni khan SMTC, Mission Vengthlangah inkhawmpui an hmang a; khuallian, minister Lalsawta chuan, kum upat vangin upate ṭangkaina a tlem phah ngai loh thu a sawi.

Lalsawta chuan Mizoram tana thil ṭha tur ngaihtuaha ngaihven reng ṭhin pawl MUP a awm chu Mizo mipuite vanneihna a nih thu sawiin, "MUP member-te zingah zirna leh eizawnna kawnga hlawhtling hmasa, harsatna tinreng paltlanga hlawhtlinna lo hmu tawhte an awm a ni. Tunlai ṭhangtharten anni aṭang hian zirtur tam tak an nei a ni," a ti.

Sawrkar hmalakna NEDP hmangin sorkar hna a innghat kher loa eizawnna ngelnghet ṭhangtharten an neih theih nan hma lak mek a nih thu sawiin Finance Minister chuan, "Hengahte hian hlawhtling tur chuan remhriatna leh bulṭanna sum mai ni loin taimakna leh tumruhna a pawimawh," a ti.

Lalsawta hian khawmpui palai zinga mipa leh hmeichhiaa upa ber Lianṭhuami (85) leh Saihleia (96) te hnenah chawi­mawina certificate leh Rs. 2000 a hlan.

MUP Aizawl South-II area-ah hian unit pakua - Mission Veng, Mission Vengthlang, Tuikhuahtlang, Thakthing, Damveng, Venghnuai, Model Veng, Salem Veng leh ITI Veng an awm a, member 2,141 an ni.