Mi kut thlaktu man turin phut

Darlawn Chhimveng Branch YMA chuan thuchhuah siamin, an member JP Lalnunsanga (25) s/o Marry Lalnun­tluangi chu February 15, 2018 zan dar 12 velah Bilkhawthlir dáiah mi pahnihin kut an thlâk niin an tarlang a; kutthlaktute chu a rang thei ang bera man turin thuneitute an phût.

Darlawn Chhimveng YMA tarlan danin, JP Lalnunsanga chu 407 truck hmangin Silchar aṭangin a haw a, mi pahnihin Kolasib thleng chuan ve an dil angin a phur a ni. Mi pahnihte chuan Bilkhawthlir daiah zunram thiar duha insawiin motor an tihdintir a; an din lai chuan mi pakhat zawkin thingbungin JP Lalnunsanga chu a vua a ni. Mi pahnihte chu an tlanchhe zui a, JP Lalnunsanga mobile phone an laksak. JP Lalnunsanga hian nimin khan Darlawn Police Sta­tion-ah FIR a thehlut a ni.

Darlawn Chhimveng YMA chuan, Mizo ngeiin kawng laka an member kut an thlak chu hriatthiam har an tih thu sawiin, "Misualte hi a rang thei ang bera man chhuak turin thuneitute kan phût a ni," an ti.