COVID-19 vangin kohhran hrang hrangte'n punkhawm tamna tur neih loh an rel

COVID-19 leng mek avangin Mizoram chhunga kohhran hrang hrangte chuan mipui punkhawm tamna tur buatsaih hrih loh an rel. Tual­chhung kohhran inkhawm erawh titawp an la awm loa, kohhran ṭhenkhat chuan inkhawm leh inkhawm loh chu tualchhung kohhran thuneihnaah an dah.

Health minister Dr R Lal­thang­liana'n COVID-19 chungchanga hma la tura a ngen­na bawhzuiin kohhran hrang hrang hruaitute chu nimin khan an ṭhukhawm hlawm a ni.

Presbyterian Church :

Mizoram Presbyterian Church chuan nimin khan officer meeting an buatsaih a, chumi hnua thuchhuah an siamah chuan 'Kohhran mal (Kohhran hmeichhia, KṬP, Pavalai Pawl) bial leh presbytery huapa puipunna ang chi reng reng leh Synod hminga ram chhung leh pawna zinchhuahna chi reng reng chu tih loh nise. Chungte chu - retreat, camping, crusade, con­sultation, seminar leh meet chi hrang hrang' tih a ni.

Tualchhung kohhran Pa­thian biak inkhawm neih leh neih loh chu kohhran mal zalennaah Mizoram Presby­terian Church chuan an dah. An thuchhuah hian March 17, 2020 zan aṭanga April 15, 2020 chhung a huam dawn a ni.

Baptist Church :

Baptist Church of Mizoram (BCM) pawhin nimin khan kohhran hote hnena ngenna leh hriattirna tichhuakin, COVID-19 len hun lai chuan ṭûl bîk thil tak takah lo chuan state pâwn lamah zin chhuak lo tûrin an ngen a, "Ram dang aṭanga khualzinte pawh min tlawh rih lo tûra hma lâk a ni," an ti a, ramdang aṭanga zin haw a bik takin COVID-19 lenna ram aṭanga lo hawte chu sorkar thuchhuak anga ni 14 mahni inah inkhung hran tur anih thu an tarlang.

Vanglaini palai zawhna chhangin BCM general secre­tary Rev. F Ramdinmawia chuan inkhawmna pangngai kalpui chu khap a nih loh thu sawiin, "Sorkarin min ngenna avangin inkhawm pangngai bak hming dang - fellowship, crusade, consultation etc. neih loh nise kan ti. Prog­ramme awmsa pawh an ṭhulh zel a ni," a ti.

UPC (Mizoram) : 

United Pentecostal Church (UPC) of Mizoram pawhin nimin khan Puipa Committee koin, COVID-19 leng mek chungchang hi an ngaihtuah. An meeting zawha thuchhuah an siamah, "He hri leng mek hi a darh zel lohna atan leh invenna atan  theihtawpa ṭan lak nise kan ti," an ti.

Mizoram UPC chuan tualchhung kohhran tinte inkhawm dan kalphung chu kohhran committee kutah an dah a, ṭul leh ṭha an tih anga kalpui turin an ti. Bial leh tualchhung kohhran tinte chu an area huam chhung ṭheuhah inkhawmpui leh puipunna thil dangte hun engemawchen buatsaih loh turin an hriattir.

General leh district level-ah pawh hun eng emaw ti chhung chu puipunna huaihawt loh an rel a, Mizoram pawn leh chhungah pawh a theih chin chin zin chhuah programme siam loh hram nise, an ti.

Mizoram UPC chuan chhungkaw tin leh tualchhung kohhran tinte chu COVID-19 a darh zel lohna atan leh kan ram leh hnam a lo him a, khawvel a lo dam theih nan a tam thei ang ber ṭawng-

ṭai tur leh March 22.3.2020 a kohhran inkhawmah ṭawng-

ṭaina nei ṭheuh turin an ngen.

Vanglaini palai zawhna chhangin Mizoram UPC gene­ral superintendent Rev. C Lalremsanga chuan tual­chhung kohhrante chu inkhawm lo tura tihngawt chi a nih loh thu sawiin, "Tual­chhung kohhranin an duh angin an rel turin kan dah," a ti.

UPC (NEI) :

Vanglaini palai zawhna chhangin UPC NEI gene­ral treasurer Rev. Zohming­than­zama chuan COVID-19 vangin Mizoram chhunga UPC-NEI district panga - Aizawl East, North Mizo­ram, Lunglei, Chhim­tuipui leh Lawngtlai West-te chuan an huam chhung ṭheuha programme an rua­hmante chu sorkar thuchhuak angin 

ṭhulh a nih thu a sawi.

Rev. Zohmingthanzama sawi danin, PYD leh LAD confe­rence, bial intlawhtawn, rally, crusade, camping leh PYD Day (March 21) lawm­na tura ruahmanna awm tawhte pawh ṭhulh vek a ni. International general superintendent David K Ber­nard chuan khawvel puma UPC member-te tan thuchhuah a siam a, an awmna hmun 

ṭheuha sorkar thuchhuah angte zawm vek turin a hriattir a ni.  

District hruaitute chuan kohhran mipuite chu thu leh awm hma chu kohhran inkhawm pangngai bak puipunna programme dang siam rih lo tur leh sorkar thuchhuakte ngai pawimawh tur leh ngaichang reng turin an hriattir a, hmun ṭhenkhata lawmthu sawina tur programme pawh sorkar thuchhuak zulzuiin ṭhulh a ni.

The Salvation Army :

Territorial commander  Commr. Lalzam­lova chuan COVID-19 vang­in London 

aṭanga inter­na­tio­nal leaders-te hoa hman tur Territorial Congress 2020 chu internatio­nal-a an hruaitute hriatpuinain ṭhulh a nih thu a sawi a, "He Territorial Congress-ah hian 

ṭhalai, nuho, naupang leh pa hote pualin inkhawmna hrang ṭheuh neih tura ruahman a ni," a ti a, Portugal-a International Leaders Conference neih tura Territorial Commissioner-te nupa kalna tur pawh sorkarin fimkhur tura khualzinte a ngenna zulzuiin an cancel thu a sawi. 

Lalzamlova chuan India Eastern Territory chhungah division pasarih leh dis­trict pakhat a awm thu sawi­in, "Corps hrang hrangte chu sorkarin hmalakna a siam angte thlawp tur leh an awmna dinhmun ang zela mipui him nan thutlukna siam turin kan hriattir, Corps hrang hrangte awmna hmun a zirin an boruak tawn dinhmun a inang dawn lo a, chuvangin an kutah thu­tlukna kan dah mai," a ti.

Hetihlai hian corps/society/outpost-a section hrang hrangte mi ina inkhawm huaihawt 

ṭhin chu neih rih loh nise ṭha an tih thu Salvation Army chuan thuchhuah siamin an tarlang.

Roman Catholic

Vanglaini palai zawhna chhangin Bishop secretary Father Jerome chuan Health Minister hnen aṭanga ngenna an dawn bawhzuiin inkhawm pawimawh zual bik lo chu kalpui hrih lo tura an in ngen thu sawiin, "Inkhawm chu kan la inkhap lo. Seminar, retreat etc.-te chu tih loh hram nise kan ti. Good Friday leh Easter Sunday-ah pawh kraws kawngzawh buatsaih loa, biak-in lama hun hmang mai turin kan in ngen a ni," a ti.