Khung hrante ruihhlo pe ṭhin man

Tun hnai khan quarantine centre-a khung hran mek ruihhlo pe ṭhin leh pek tum Aizawl leh Siahaah man an ni a, police kutah hlan an ni.

Khatla South-a chêng mi pakhat chuan an veng ṭhenawma quarantine centre-a khung hran mek chu ruihhlo a pe ṭhin tih hriat a ni a; CCTV aṭanga finfiah a nih hnuah quarantine centre duty-te'n manin, Khatla South Local Task Force hnenah an hlân. Khatla South LTF chuan police hnenah hriattirin, police-in an la a, a swab sample endik a ni ang.

Vanglaini-in Khatla South LTF hruaitute hnen aṭanga thu a dawn danin, ruihhlo pe ṭhin man a nih lai hian ruihhlo a kawl lo a, hriau (syringe) a kawl thung. Quarantine centre-a awmte chu an ATM card-te kawlin ruihhlo a ngaihtuahsak ṭhina hriat a ni.

Khatla South LTF-te chuan fimkhur thilah ruihhlo pe ṭhin chhungte chu home quarantine-in an awmtír nghal a, veng mipui pawh páwna chhuak tam lo turin an hriattir nghal bawk.

Siahaah pawh chawlhkar hmasa tìr lam khan quarantine centre-a awm mek ruihhlo pek tum mi pahnih man an ni a, Mara Thyutlia Py (MTP) hnenah hlan a nih hnuah police kutah an pe. Ruihhlo pek tumtute hian quarantine centre-a awmte ruihhlo a pe hman lo thung.