Home quarantine-a awm positive-in ATM a hmantir mi 3 swab sample endik

Ramhlun Venglaia home quarantine lai Covid-19 kai tih hmuh chhuah chu a ṭhiante'n a ATM card hman sak a, zu an lei sak avangin a ṭhiante pathum chu an swab sample test tura lak niin, result a chhuah hma chuan quarantine an ni dawn.

Ramhlun Venglai local task force hotute hnen aṭanga Vanglaini thudawn danin, an venga home quarantine mek chu a ṭhiante pathum - Ramhlun Venglai, Ramhlun North leh Ramhlun Vengthara mite chuan a ATM card hmanga pawisa la chhuakin zu an leisak a, zu leitute sawi dan chuan zu hi in ho loin quarantine-a awm mek ta tur hi an vawm lut a ni.

Hetihlai hian Covid-19 kai tih hmuh chhuah tak ATM card an hman sak avang hian fimkhur thilah an swab sample test tir a ni. An pathum hian Ramhlun North-ah quarantine vek an ni a, an positive palh a nih chuan an kai theih tura ngaihte swab sample test theih tura ruahmanna siam nghal a ni.

Mipui vantlang inkai chhawn (community spread) awm palh thei a nih avangin heng veng pathumte hian mipuite chu fimkhur lehzual turin an hriattir a ni.

Ramhlun Venglai khawtlang hruaitu pakhat chuan, "Heng mi pathumte hi an thil sawi dan a dang a dang a, thudik pawh hriatthiam a har. Police-ah kan thlen tawh a, engpawhnise an test result a chhuah hma chu kan khung hrang vek phawt ang," tiin Vanglaini a hrilh.