SEC-in Village Council inthlan turah State sorkar thu a ngaichang mek

Mizoram State Elec­tion Com­mission (SEC) hotute chuan, village council leh local council inthlan hun turah COVID-19 avangin state sorkar thu ngaihchân a ngaih thu Vanglaini palai zawhna chhangin an sawi. Kumina VC/LC inthlan neih tura electoral roll ennawn mekah Tripura refugee camp-a Bru awm mekte paih an ni dawn lo. 

State election commissioner (SEC) Laima Chozah chuan, VC/LC inthlan hun tur ruattu tur chu state sorkar ni lo mah se, dan leh thupek kengkawhtu an nih avangin biakràwn an ngaih thu a sawi a, "Tunah hian state sorkarah lehkha kan thehlut mek a, chhànna kan la dawng lo. Inthlan buatsaih an ti a nih pawhin keini lam chu kan inpeih reng," a ti.

SEC hotute hnen aṭanga thu dawn danin, tuna VC/LC ding mekte term chu May 7, 2020-ah a tàwp dawn a, chumi hmaa VC/LC thar din hman tura inthlan buatsaih a ngai. Chutih rualin, eng emaw harsatna bik a awm a nih chuan state sorkarin thla 18 thleng VC/LC-te term pawtsei turin thuneihna a nei.

Tunlai hian VC/LC inthlan atan electoral roll buaipui mek a ni a, chutah chuan Tripura refugee camp-a Bru awm mekte paih a ni dawn lo. SEC hotute chuan, Bru-te chungchangah Election Com­mission of India aṭangin thu dawn an la neih loh avangin Tripura-a Bru-te chu an lo paih ngawt thei lo tih an lo sawi tawh. VC inthlanah hian MLA inthlan hnuhnung ber electoral roll ringa roll siam tur a ni a, electoral roll hnuhnung berah hian Bru-te an la chuang a ni.