ZORO, MZP, MPYCC leh ZPM-te'n Manipur-a Kuki khaw hâl an dem

Zo Reunification Or­ganisation (ZORO), Mizo Zirlai Pawl (MZP), Mizoram Pradesh Youth Congress Committee (MPYCC) leh Zoram Peo­ples' Movement (ZPM) party chuan tunlaia Tang­khul (Naga) leh Kuki inkara buaina chhuak mek chungchangah thu­chhuah an siam a, Kuki-te thlavâng an hauh.

ZORO chuan, nimin khan Kuki leh Tangkhul inkara buaina chhuak chu an president R Sangkawia kaihhruaiin an ngaihtuah a, resolution an pass a ni. Resolution-ah chuan, "March 16, 2020 zing dar 8-a kan unau Kuki khua Chassad, Manipur-a mi NSCM-IM mi leh sate leh Tangkhul Naga mi leh sate'n an hâl hi pawi kan ti a, hriatthiam har kan ti hle. Kuki-te chunga thil thleng hi âwm lo kan ti a, kan unaute tawrhna hi thinlung takin kan tawrhpui tak zet a ni," an ti.

Kuki khua hâlnaah a mawhphurtu leh meizang hlaptu tam tak an awm ngei an rin thu sawiin, "Chassad  hâltute hi a rang lamin sorkarin man chhuak ngei se, a mawhphurtute an phû tâwk hremna pe ngei turin thuneitute kan phût tlat a ni. Sorkarin zangnadawmna a rang thei ang bera a pek kan phût tlat bawk," an ti a; Kuki-te thlavâng hauha pên chhuah a ngai a nih chuan, an inpeih reng thu an tarlang.

MZP chuan, Chassad khuaa Kuki-te nasa taka nghaisak an ni leh an khua hâl a ni chu an hrethiam lo hle tih sawiin, "In leh lo inhâlsak mai bakah, tharum thawhna a thleng leh kan unau pawisawi lote tawrhna hi pawi kan ti a, Manipur police SP leh Assam Rifles-te awm reng laia tharum thawhna a thleng hi kan dem tak zet a ni," an ti. India ram state ṭhen­­khatah hnam tênau zawkte an him lo fo leh sorkarin an thlavâng a hauh ṭha tâwk lo ṭhin chu pawi an tih thu sawiin MZP chuan, Manipur sorkar chu chak taka hma la turin an phût. "Pawi khawih­tute hmetmita an phu tâwk hremna pe ngei tur leh Kuki-te himna tur ngaih­tuah a, in leh lo chànte zangnadawmna pe turin kan phût tlat a ni," an ti a, a ṭul anga Kuki-te ṭanpui turin MZP chu a inhuam thu an sawi.

MPYCC chuan ramri inchuh avanga state khat chhunga thil  thleng chu an dem thu tarlangin, "Zohnah­thlak unau Manipur Kuki te a tawrhpui takzet a ni. Manipur ramchhunga hetiang thil tha lo leh pawi a thleng hian Manipur a BJP kaihruai sorkar nepzia leh state chhung himna tur an ngaihthahzia a tilang chiang hle a ni," an ti.

Mizoram sorkar chu Zohnah­thlak unau Kukite thlamuan a, an thlavang hauh vat tura an phut thu tarlangin MPYCC chuan, "Hetiang ang thil duhawm lo hi a thlen nawn tawh lohna turin Manipur BJP kaihhruai sorkar leh Central BJP sorkar hmala vat turin kan phut a ni," an ti a, thil tisualtute dan anga an phu tawka hrem annih ngei theihnan rang taka chet lak vak an duh thu an sawi.

ZPM pawhin thuchhuah siamin, Zo hnahthlak Kuki khua Chassad hâl a ni chu pawi an tih thu an tarlang a, "Chassad khaw mipui, kan unau Kuki-te kan lainat hle a, thil thleng hi demawm kan ti hle," an ti a; Chassad khaw hâlnaa mawhphurtute sorkarin a hrem ngei an phût.

ZPM chuan, Chassad khuaa buaina thleng ang chu thleng nawn tawh lo se an duh thu sawiin, "He thil thleng vang hian hnam leh hnam intihbuaina thleng zui lo se kan duh hle a, Chassad khaw mipui kâng tuarte an phu tâwk zangnadawmna pe ngei turin Manipur sorkar kan phût a ni," an ti.