KHAWTHLIR

Mizoram sorkarin quaran­tine centre awm hun chhung atan ni 14 bituk mah se, Vanglainiin a hriat theih chinah Edenthar, Republic Veng, Tuikhuahtlang, Chanmari West, Thakthing, Ramhlun South leh Zuangtui local task force-te chuan an veng chhunga quarantine-te chu ni 21 chhung an awm tir.

Mizoram Government Medical Laboratory Technician Association (MGMLTA) chuan June 5 khan ZMC Covid-19 Laboratory leh R Deng­-ṭhuama Hall quarantine centre an tlawh. MGMLTA chuan, thawktute inpekna fakawm an tiin ṭang sauh sauh turin an fuih a, ṭawng­ṭaina nena thawhpui zel tur­in mipui an sáwm bawk.

Aizawla veng ṭhenkhat - Chanmari West, Edenthar, Republic Veng, Tuikhuah­tlang, Vaivakawn leh Zuangtuite chuan an venga home quarantine-te chu an kawngka tala hmanga kalhin, a chabi local task force-te'n an kawl niin Vanglaini chuan thu a dawng. Hetihlai hian veng ṭhenkhat chuan an venga home quarantine kalpui an phal lo thung.

June 6, Inrinni khan  Haulawng Pastor Bial ṬKP chuan an khuaa Hausiampa Hall-ah blood donation camp an huaihawt a, Lunglei Civil Hospital tan thisen unit 83 an pe a, petute mipa 70 leh hmeichhia 13 an ni. Bungkawn Vengthar Branch KṬP pawhin an din champha pualin Synod Hospital blood bank-ah kalin thisen unit 40 an pe a, petute mipa 35 leh hmeichhia panga an ni.

IPR minister Lalruat­kima chuan June 5, Zirtawpni khan a pisaah C Zama lehkhabu ziah 'Zalenna sualtute East Pakistan-ah' tih chu a tlangzarh. Lehkhabuah hian zalenna sual ṭan tirha MNF sipaite East Pakistan (Bangladesh) an kal dan leh an chhuahsan dante tarlan a ni.

Lunglei district bawrh­sap V Lalsangliana chuan, Lunglei district-a Covid-19 vei mek awmna - BCM Ramthar community quarantine centre, EMRS Boys' Hostel quarantine facili­ty leh Covid Care Centre, ETC, SIRD, Pukpuite chu luh leh chhuah phal lohna hmun (containment area) atan a puang.