Covid-19 hripui vei mek awm lohna Khaw ṭhenkhatah sikul hawng ṭan
Mizoram sorkarin a phal ang leh bawrhsapte ruahman angin Mizorama khaw eng emaw zatah sikul hawn ṭan a ni. Hetih lai hian, Kolasib district pumpuiah sikul hawn phal a la ni lo thung.
Covid-19 léng vanga Mizoram sorkarin inkaihhruaina a tihchhuah thar berah chuan Covid-19 vei mek awm lohna khuaah DC leh task force-te ruahmannain sikul hawn phal a ni tawh a; chumi ang chuan district hrang hranga bawrhsapte leh village task force-te'n sikul hawn dan tur an ruahman a ni.
District hrang hranga bawrhsapte chuan thupek chhuahin, sikul hawn phalte leh hawn phalna khuate an tarlang a; sikul hawn turte chu community covid care centre emaw, quarantine centre emaw atana hman a nih chuan phuh fai (sanitise) hmasak phawt turin an hriattir.
Sikul kái ṭan tawhte chu School Education department-in inkaihhruaina (SOP) a siam ṭha taka zâwm tur te, hripui laka invênna atana tih tur leh tih loh turte ngaih pawimawh tur te, sikul hawnna khuaah Covid-19 vei an awm thar chuan DC hriattir vat turtein an hriattir bawk.
Sikul eng emaw zatah chuan uniform la nei lo zirlai tam tak an awm avangin uniform ha loin sikul an kái ṭan a ni.
Aizawl DC Dr Lalhriatzuali Ralte chuan August 12, 2021 khan thupek (order) chhuahin, Aizawl district-a sikul 27-te chu hawn phal a nih thu a tarlang.
Champhai district-ah chuan Champhai khawpui leh Zokhawthar tih loh khaw dang zawng, hripui vei mek awm lohnaah chuan sikul hawng turin Champhai DC Maria CT Zuali'n August 9, 2021 khan thupek a chhuah.
Vanglaini palai zawhna chhángin Maria CT Zuali chuan, August 16, Thawhṭanni aṭangin an district-a khaw hrang hrangah sikul hawn ṭan a ni a, sikul hawn zat chiah erawh an hriat theih rih loh thu a sawi a, "Zirtirtu khaw danga awmte an awm a, chu'ngte chu an thawhna khua an thlenah inkhung rihte a ngaih avangin August 16-ah chuan an hawng vek thei lo ang," a ti.
Champhai DC sawi danin, zirlai awm tamna sikul, pawl (class) khata zirlai 30 aia tam awmnaah chuan zirlaite inkal chhâwk tura tih a ni a; zirlai 30 tlin lohna pawlah chuan vai kal theih a ni. Anganwadi pawh kal ṭan tura tih an ni a, mahse, anganwadi ṭhenkhat chu inkhung hranna atan hman a nih avangin an hawng ṭan vek thei lo tura ngaih a ni bawk.
School Education department hotute hnen aṭanga thu dawn danin, Kolasib district-ah chuan hripui a darh nasat rih avangin district pumpuiah sikul hawn phal a la ni lo.
Serchhip DC Kumar Abhishek chuan August 11, 2021 khan thupek chhuahin, sikul kai ṭan theihna khuate a tarlang a; chu'ngte chu khaw 17 a ni.
Lawngtlai DC Dr Andrew H Vanlaldika chuan August 13, 2021 khan thupek chhuahin, August 16 aṭangin Covid-19 vei awm lohna khuaah sikul kai ṭan tur a nih thu a tarlang a; sikul hawn theihna khaw 47 a tarlang nghal.
Saitual DC VL Hruaizela Khiangte pawhin August 13 khan thupek chhuahin, an district-a sikul hawn phalte a tarlang. Sikul hawn phalte chu high school leh a chung lam a ni tlangpui a, a vaiin sikul 20 a ni.
Khawzawl district-ah chuan Khawzawl khawpui chhung tih loh khaw dang, Covid-19 vei mek awm lohna khuaah chuan sikul hawn phal a nih thu Education department hotute'n an sawi.