Hmarchhak state health minister-te'n Union Minister hoin Covid-19 an sawiho
Nimin khan Guwahati-ah Union Health minister Mansukh Mandaviya hoin hmarchhak state-a health minister-te'n 'Review Meeting on Covid-19 Pandemic and Immunization in NE States' an nei a; Health minister Dr R Lalthangliana pawh telin, Mizoramin Covid-19 a hmachhawn dan a sawi bakah, Mizoram mamawhte a thlen.
Dr R Lalthangliana chuan, Mizoram chu hmarchhak kila awm a nih avangin hripui a lut tlai deuh ṭhin tih sawiin, "Second wave pawh India ram hmun dang aiin a thleng tlai. Hripui kai thar la sang viauin lang mah se, a vàwrtàwp kan thleng tawh a, tlakhniam lam kan pan ve ṭan niin a hriat. Mipui leh sorkar an ṭanrual avangin hripui vanga thi chu India ram hmun dang nena khaikhinin kan tlem hle a ni," a ti.
Hripui veite sûlhnu chhui leh inkhung hran kalpui dan sawiin R Lalthangliana chuan, "Sorkar laipuiin hri kaite enkawlna tura a ruahman DCH, DCHC leh CCC bakah, khawtlangin CCCC an siam a, hri kaite lâk hran leh rang taka enkawlnaah nasa takin awmzia a nei a ni," a ti a; CCCC chu sorkar tel loin IMA leh local volunteer-te'n an enkawl thu a sawi.
Dr R Lalthangliana chuan sorkar leh mipuite'n hripui donaah awmze neiin hma an la tih sawiin, "State leh district level bakah village/local level-ah task force din a ni. Lockdown puan laiin mipuiin harsatna an tawh loh nan thingtlang khuate'n khawpuia harsatna tâwkte ei tur la khawmin, a man phût loin an pe a ni," a ti.
Covid-19 first wave leh second wave dinhmun tarlangin R Lalthangliana chuan, "Second wave-ah nasa takin kan tuar a, kum naupang lamah hri kai an tam," a ti a; third wave thleng thei laka inpuahchahnate a tarlang.
Dr R Lalthangliana chuan, Covid vaccine pekah Mizoram chu India ramah a ti ṭha pawl a nih thu sawiin, "Task force leh NGO bakah, sakhaw hruaitute nen ṭang tlangin ruahmanna siam ṭhin a ni. Mipui zirtir kawngah nasa taka ṭan kan lak avangin vaccine pek chhuah kawngah hma kan sawn a ni. Kum 18 chung lam first dose la 83% an ni a, full dose la chu 34% an ni," a ti.
Mizoram Health Minister hian hmarchhak state-te'n harsatna an neihte sawihoa chinfel dan ngaihtuah turin Delhi-a meeting buatsaih te, health sector-a NE state bik buaipui tur officer dah te, DoNER aṭanga NLCPR hnuaia 10% hmarchhak tana dah hran chu Covid-19 dona atana mumal taka hman zung zung theih a duh thute a sawi bawk.
Dr R Lalthangliana hi National Health Mission mission director Dr Eric Zomawia leh IDSP state nodal officer Dr Pachuau Lalmalsawma ten an ṭawiawm a ni.