MLA Andrew H Thangliana vui liam

Tuirial Assembly constituency bialtu MLA Andrew H Thangliana (44) h/o H Lalromawii, Chawlh­hmun, Aizawl chu nimin zing dar 6:35 khan natna hrang hrang vangin Ebenezer Medical Center-ah a thi a, nimin khan Chawlhhmun community hall-ah vui a ni.

Nimin chhun dar 12:30-a Andrew H Thangliana vuinaah chief minister Zoramthanga leh Assembly speaker Lalrinliana Sailo hoin Rajya Sabha MP, minister, MLA leh political party hruaitute an tel a; chhungkaw aiawh bakah, Chief Minister, Speaker, Assembly Secretary leh ZPM leader Lalduhoma ten thu an sawi.

Andrew H Thangliana s/o Samuel H Thangliana (L) hi October 4, 1977-ah a piang a, fapa pahnih leh fanu pakhat a nei.

Delhi University hnuaia Ramjas College-ah BA a zir a, final exam laia a hrisel lohnain a tlakbuak tak avangin a zir zo lo a; hemi hnu hian hnuah Indian Institute of Business Administration aṭangin Diploma in Business Administration a zo.

Kum 2017-ah politics luhchilhin, ZNP a zawm a, kum 2018-a ZPM a pian hnuah ZNP aṭangin an inchhûng lut. Kum 2018-a MLA inthlanpuiah Tuirial bialah ZPM (independent) candidate niin, thlan tlin a ni a, amah hnaih bertu chu vote 204-in a hneh.

A chanchin ziahnaa tarlan danin, kumin July thlaa CT Scan hmanga enfiahnaah a thin (liver)-ah thil dum deuh hmuh a nih avangin biopsy tih leh turin July 21 khan Civil Hospital, Aizawlah dah luh a ni a; damdawi-ina a awm hnuah harsatna dang a awm avangin biopsy tih a ni lo.

Kumin August 5-ah Ebenezer Medical Center-ah dah luh a ni a, high dependency unit (HDU)-ah enkawl nghal a ni. August 12 zanah a thâw a buai a, August 13-ah ICU-ah dah luh a ni a, August 15 aṭangin ventilator hmanga enkawl a ni. A thin a ṭhat loh bakah pneumonia a nei a, a taksaah thi pût a awm bawk a, thisen eng emaw zat pek a nih hnuah nimin zing khan a thi ta a ni.