Buarchep leh Aitlanga Mizote rama Assam police-te nawr chhuah phût

JAC on Inner Line Reserve Forest Demand (ILRFD) chuan nimin khan Aizawl Press Club-ah thuthar thehdarhtute an kâwm a; Buarchep leh Aitlanga Mizote rama Assam police inkulhte nawr chhuak turin Mizoram sorkar an phût tih an puang.

JAC on ILRFD vice chairman L Ramdinliana Renthlei chuan, tun hnaia Mizoram-Assam ramri buaiah Mizoram sorkarin theihtawp a chhuah nia a lan thu sawiin, "Ram chhan nana Mizoram police-in silai an hmet puak hi lawmawm kan ti a, Vairengte leh a chhehvel khaw mipui huaisenna leh thawhrimnaah lawmthu kan sawi tak meuh. Kan ram humhalhna tura ke pên a, tha thawh duh apiangte kan thawhpui thei reng a ni," a ti.

Kum tam tak Vai­rengte khaw mite'n an cheibâwl tawh Aitlang ram, chhungkaw 18-in eizawnna atana an hman chu Assam sorkarin June 29, 2021 khan an hnehchhuh a, Assam police-in camp siamin an luah mek tih sawiin L Ramdinliana chuan, "Assam police-te hian huan thlaite tichhiain, hlo túrte hmangin an kah hlumsak a ni," a ti a; Assam police-te'n Mizote ram ṭín 80 vela zau an luah mek thu a sawi.

L Ramdinliana chuan, Phainuam Buarchepah kum 60 chuang Mizo chhungkuain eizawnna atana an hman tawhna hmunah Assam police-in camp an siam a, khawih phal tawh loin Mizote an luahlan mek thu a sawi a, "He hmunah hian kuhva kung 4,000 chuang, sangha dil eng emaw zat, balhla hmun leh Mizo leilet buh tam tak thar ṭhin a ni," a ti.

Mizoram chhung Aitlang leh Buarchepa Assam sorkar inkulhna hmun chu Mizoram sorkar leh mipuiin an pawm BEFR 1875 ramri chhunga mi a nih thu sawiin Ramdinliana chuan, "Heng hmunah hian tun thlengin Assam police an la inkulh a, an camp an la thuam ṭha sauh sauh a ni," a ti a; a rang thei ang bera Assam police-te nawr chhuak turin Mizoram sorkar an phût tih a sawi.

JAC on ILRFD hruaitute sawi danin, Mizoram sorkarin Assam police-te a nawr chhuak ngam lo a nih chuan, nawr chhuah an nih theih nan a ṭul angin hmalak an tum a ni.

Ramri buai awm reng chu chinfel thuai ni se an duh thu sawiin JAC on ILRFD hruaitute chuan, "Hun rei tawh tak aṭangin buaina a awm deuh reng a, silai pawh hmeh puah a lo ni tawh ṭhin. Mahse, ramri chinfelna tur tak taka inbiakna a awm ngai lo hi pawi kan ti hle. Ramri buai chingfel lo a, a chhehvel buaina chinfel hi ramri buai chinfelnaah kan ngai ta mai em ni tih hi kan zawhna a ni," an ti.

JAC on ILRFD chuan hruaitute chuan, ramri-ah buaina awm se, silaite hmet puakin inkâp se an tih chhan chu sorkar laipui auh eih a nih thu sawiin, "Central sorkar kaihhruaina hnuaia Mizoram leh Assam sorkar inbiakna neih a ni," an ti a; chutih laiin, July 26, 2021-a silai hmeh puah a ni chung pawhin sorkar laipui a ngawih reng thu an sawi.

Mizoram sorkar chu ramri buai chinfel a nih theih nan chak taka hma la tura ngenin JAC on ILRFD chuan, "Mizoram Council of Minister meeting-in a pawm tawh BEFR 1875 ṭan chhan chunga kan ramri buai chinfel a nih theih nan central sorkar biaa hma la thuai turin kan phût tlat a ni," an ti.