Assam police-in Bilaipur-ah Mizo an kâp, an kâp fuh lo

Thawhṭanni zan zanlai pelh hnu, nimin zing dar 1 vel khan Bilaipur, Assam-a ui la tura kal Vairengte khaw mi pathum - Lalduhawmi, Lalchhandama leh Vanlalrovi te chu Assam police-te'n an lo kâp a, an kâp fuh lo. Kolasib DC Dr H Lalthlangliana chuan nimin khan he thil thleng chungchang hi a sawifiah.

Vairengte Joint VC tarlan danin, Vairengte mi pathumte hi Bilaipur lamah ui la tura hnam dangte'n an hriattir angin an kal a, Bilaipur an pan laiin Assam police-te'n silaiin an lo kâp a ni.

Lalduhawmi chu khâmah a zuang thla a, khawvar hnuah Vairengte panin, a bán ruh a tliak nia hriat a nih avangin Vairengte damdawi-inah a inentir a ni. Lalduhawmi chuan, a sahimna zawngin khâmah a zuan thlâk thu leh a ṭhiante awmna chin a hriat loh thu a sawi. Lalchhandama leh Vanlalrovi te chu nimin khan him takin Vairengte-ah an lêt leh a ni.

Vairengte mi pathumte bum chhuaktu chu Nibus-a, Bilaipur a nih thu an sawi.

Dr H Lalthlangliana chuan, thil thlenna hmun chu Aitlanga Mizoram police duty-na thlang, Bilaipur hnaih lam a nih thu sawiin, "Thil thlen dan ngun taka chhui a nih hnuah Assam police duty-te hi silai hmet puaktu zawk an ni tih hriat a ni. Vairengte mi pathumte hi Nibus-a tia hriat, Bilaipur mi chuan ui lei tura chah chhuakin, Aitlangpui an thlen hnuah Assam police duty-te'n silai an hmet puak ta a ni," a ti.

Silai a puah hnuah mi pathumte chu an tlân darh tih sawiin H Lalthlangliana chuan, "An tlân darhna lamah an zinga pakhat chuan a bán a sawh na deuha hriat a ni," a ti a, mi dang chu an hliam loh thu a sawi.

Dr H Lalthangliana chuan, Assam police duty-te'n civil mite chunga silai an hmeh puah chungchanga lungawi lohna thu Hailakandi DC hnenah ziakin a thlen tih sawiin, "Vairengte mite thlêm chhuaktu Nibus-a tia hriat hi zawng chhuaka thubuai siamsak ngei tura hriattir a ni. Ramria buaina tipunlun zawnga thu thehdarh awm lo se, sorkarin a ṭul apiangah hma a la zel ang," a ti.

Kolasib Bawrhsap chuan, ramria duty-na hmun hrang hrangte chu mipui tan tlawh rih lo tura ngenna thuchhuah siam a ni tawh tih sawiin, harsatna a awm chhunzawm loh nan zâwm turin mipui a chah nawn leh a ni.