KHAWTHLIR

Aizawl Civil Hospital medical superintendent Dr Lalhmuchhuaka chuan nimin khan circular a tichhuak a; thuchhuak dang a awm leh hma chu damlo kan hun (visting hour) tihtawp a nih thu a tarlang. Damlo pakhatah awmpui pakhat zel awm phal a ni a, a bak a ṭul chu ward superintendent/nurse duty-te phalna lak tur a ni. Damlo chaw pe turte tan zing dar 8-9 leh tlai lamah dar 4-5 inkar hawn a ni dawn a, chumi chhung chuan damlo awmpuitute pawh inthlak theih a ni ang.

Aizawl Zoological Park (Sahuan) chu COVID-19 hri léng vangin mipui tlawh theih loh turin March 31, 2020 thleng khâr a ni. Mizoram Science Centre pawh nimin aṭang khan mipui tlawh theih lohin khâr rih a ni.

March 16, Thawhṭanni khan Mizoram Lok Sabha MP C Lalrosanga chuan Guwahati Mizoram House-ah a ṭul anga Guwahati Mizo Welfare Association (GMWA) te'n an hman atan MP fund aṭanga a leisak ambulance 

a hlan.

State Bank of India (SBI) chuan an ATM booth tinah hand saniti­zer (kut silfaina) dah turin hma an la mek a, booth ṭhenkhatah chuan an dah tawh. Hand sanitizer-te chu la bo lo turin mi tin an ngen a ni.

Mizoram Journalists' Association (MJA) chuan March 26-27 ­chhunga General Conference neih an tum chu COVID-19 lêng vangin tiam chin awm loin an ṭhulh tih an puang.

Sihphir Bial KṬP chuan nimin khan blood donation camp an huaihawt a, Aizawl Civil Hospital tan thisen unit 52 an pe a, a petute hi mipa 35 leh hmeichhia 17 an ni. 

Sialkal Range Development Council (SRDC) Cell Office, Venghluia guest house chu nimin khan SRDC chairman L Thanmawia, MLA-in a hawng.

GoAir chuan COVID-19 léng vangin an thlawhtheihna Lengpui Airport-a ṭum tur zawng zawng chu March 19, 2020 aṭanga April 15, 2020 thleng an titàwp.