KHAWTHLIR

Thisen pe
Mizoram Gorkha Youth Association (MGYA) chuan nimin khan MGYA din champha pualin Synod Hospital Blood Bank-ah thisen unit 42 an pe a, petute mipa 41 leh hmeichhia pakhat an ni.

Boruak ziaawmah Zirtirtu lâk tum
School Education minister Lalchhandama Ralte chuan Khawzawl Higher Secondary School (science & commerce) sakna tur hmunhma a tlawh a, chak zawka hmalak dan tur leh thil tih hmasak ngaite a sawipui. Minister chuan, "Hri léng avanga harsatna kan tawh mek lai pawhin sorkar chuan zirna a ngai pawimawh. Zirtirtu lakna tur peih vek a nih tawh a, hri lêng vanga boruak a zia veleh hna lak tum a ni," a ti.

MLA Andrew sûn
Mizoram Legislative Assembly chuan nimin zing dar 6:35-a thi Tuirial bialtu MLA Andrew H Thangliana sûnna thuchhuah a tichhuak a, "Mizoram sorkar leh Mizoram Legislative Assembly chuan Pu Andrew H Thangliana thi hi hun lo a tiin, ram leh hnam tana hna a lo thawhte a ngaihluin a chhuang hle a ni," a ti.

CCCC tlawh
Covid-19 Medical Operational Team chairman Dr ZR Thiamsanga, MLA chuan August 16, Thawhṭanni khan Kulikawna community covid care centre a tlawh a; pawisa, hmai tuamna, pulse oxymetre leh kut tihfaina eng emaw zat a pe.

Loneitute zirtir
Siaha District Agriculture dept. chuan nimin khan National Food Security Mission hnuaiah Chheihlu, Zyhno leh Kiasie a loneitute tan tlangram leileta van ruahtui ringa buh leh thlai chin dan leh hlawk zawka kum khata vawi hnih thar chhuah dan tur an zirtir.

Swab endik rûnpui
IDSP chuan August 16, Thawhṭanni khan Aizawla veng pahnihah swab sample endik rûnpui an nei leh a, mi 1,211-te sample endikah Covid-19 vei mi 31 (2.55%) hmuh chhuah a ni. Kanan Venga sample 1,044 endik aṭangin hripui vei mi 22 (2.10%) leh Tuikual South-a sample 167 endik aṭangin hripui vei pakua (5.38%) hmuh a ni.