Political party-te'n MLA thi an sûn
Nimin zinga thi Tuirial bialtu MLA Andrew H Thangliana chu political party-te'n an sun thu leh a kalsan a chhungte Pathianin thlamuan tura an duh thu, thuchhuah siamin an tarlang.
Andrew H Thangliana telna ZPM chuan, Tuirial bialtu MLA a thi chu pawi an tih thu sawiin, "Kan sûn tak meuh meuh a, ZPM party tan chànna nasa tak a ni. A hmun ruak hnawh khah a har dawn hle. A kalsan tâk a chhungte leh a bial mipuite Pathianin awmpuiin thlamuan zel rawh se tih hi kan ṭawngṭaina a ni," an ti.
ZPM chuan, Andrew H Thangliana chu ṭhalai viak ṭha leh taima a nih thu sawiin, "Mizoram leh a bial hmasawnna tura theihtawp chhuahtu, rethei leh ṭanpui ngaite tana inpe zo em em thihna hi Tuirial bial mai ni lo, Mizoram tan chànna nasa tak a ni," an ti a; a duh leh tum angin hna thawk hman lo mah se, a sûlhnute an theihnghilh dawn lo a, an thinglungah a nun reng dawn thu an tarlang.
MNF party chuan, "Pu Andrew H Thangliana (44), kum 2018 inthlanpuia independent-a ding MLA atana Tuirial constituency-a thlan tlin, ZPM Legislature Party MLA ni mek, Chawlhhmun venga chhungkuaa cheng mekin min boralsan ta mai hi MNF chuan hun lo a tiin, pawi a ti tak zet a, thinlung takin a sún a ni," an ti a; a nupui fanau leh chhungkhatte chu Pathian thlamuanna leh awmpuina chang turin duhsakna an hlân.
BJP, Mizoram Pradesh chuan, Andrew H Thangliana a thi chu mak an ti a, an ui thu leh a nupui fanau leh chhungkhatte an tawrhpui tak zet thu an tarlang a, "Ṭhalai duhawm tak kan chán ta mai hi pawi kan ti hle a, a bial tana a inpeknate a hluin, hetiang mi taima leh inpe mahni bial leh Mizoram hmangaihtu kan chán hi pawi kan ti tak zet a ni," an ti.
Peoples' Conference party pawhin Andrew H Lalthangliana an ui a, an sûn tak zet thu leh a chhungte leh a bial mipuite Pathianin awmpuiin thlamuan se an duh thu an tarlang a; "Ram leh hnam tana a súr a sa hnuaia thawk rim ṭhin, a bial mipui leh mi rethei leh chanhaite hmangaih leh duhsak taka dâwm ṭhintu thihna hi Tuirial bial mipui leh kan ram leh hnam tan chànna nasa takah kan ngai," tiin, Zo fate thinlungah a nun reng tawh dawn thu an tarlang.