Kum 9 chhungin lirthei vangin Mi 757-in nunna an chán

Traffic Police-te chuan nimin khan Aizawl Press Club-ah thuthar thehdarhtute tan kawngpuia himna (road safety) chungchanga thil pawimawh hrang hrang inhrilhhriatna hun an buatsaih a, IPR director David L Thangliana'n a hmanpui. Inkhawmah hian kum 9 chhungin lirthei chetsualna vangin mi 757 an thih thu tarlan a ni.

David L Thangliana chuan, media-te pawi­mawhzia sorkarin a hriat thu sawiin, "Aizawl traffic tâwt lutuk tiziaawm tur leh motor accident pumpelh thei turin mipui hnena a zau thei ang bera awareness pe theitu chu media-te an ni. Heng harsatna kan tawhte hi tun aṭanga a siam ṭhat dan kan zawn loh chuan hun lo kal zelah buai a zual tulh tulh dawn," a ti.

Inkhawma tarlan danin, Aizawl district chhungah July 2017 thleng khan mimal leh sorkar motor belhkhawmin 1,26,470 a awm tawha; chung zinga 60-70% chu Aizawl khawpuiah a awm a, chu chu chawhrualin lirthei 88,529 a ni.

Aizawl District Transport Office-ah ni tin lirthei thar 30-40 ziah luh thin a ni. Aizawl Municipal Corporation huam chhungah motor tlan theihna kawngpui belhkhawmin km. 300 vel a awm a, ni tin traffic police 200 vel an duty ṭhin a, traffic police pakhatin lirthei 300-400 inkar vil ang an ni.

Aizawl district chhungah lirthei ke pahnih nei (two wheeler) mimal ta 78,899 leh sorkar ta 1,285 a awm a, a vaiin 80,184 a ni. Aizawl khawpui bikah chawhrualin a tlem berah two wheeler 50,000 vel a awm.

CID (Crime) report-a a lan danin, kum 2008 aṭanga 2016 thleng khan Mizoramah road accident vawi 988 a thleng a, mi 757 an thi. State Road Safety Council chuan target insiamin, kum 2020-ah chuan motor accident 50%-a tihtlem a tum a ni.

India ramah kum 2016 chhung khan accident ṭum 4,80,652 a thleng a, mihring 1,50,785 an thi. Two wheeler accident tam berin car, jeep leh taxi-in a dawt a, accident-a thi zingah two wheeler accident-a thi an tam ber bawk.

Inkhawm hi Traffic SP C Lal­thanmawia'n a kaihruai a; MJA president Vanlalrema Vantawl-in thu a sawi bakah, Traffic deputy SP C Vanlalvena'n road safety chungchanga thil hriat tur pawi­mawhte a sawi a ni.