Museum Week hman mek a ni
Mizoram State Museum chuan nimin khan Museum Week an hmang ṭan. Museum Week chhung hian Mizoram State Museum chu a duh apiang tan a thlawna tlawh theih a ni a, Mizo mipuite chu museum tlawha en ṭheuh turin an sáwm.
Museum Week hian Mizoram State Museum chu ni tin chawhma dar 10 aṭanga tlai dar 4 thleng en man awm loa hawn a ni dawn a; zirna-in pasariha zirlaite a bika sawm an ni bawk. Museum Week hi kum 2004 aṭangin kum tin February thla chawlhkar tawp berah hman ṭhin a ni.
Mizoram State Museum hian 2016-17 sorkar kum chhung khan tlawhtu mi 10,147 an nei a, museum en man aṭangin sorkarah Rs. 64,000 an chhûng lût. Sorkar kum kal mekah nimin thleng khan tlawhtu mi 3,068 an nei tawh a, sorkarah Rs. 38,480 an chhûng lut tawh. Kum kal meka museum tlawhtu zinga mi 19 chu ram dang mi an ni a, mi 51 chu Mizoram páwn lam mi an ni.
State Museum-ah hian gallery paruk a awm a, object 3,757 la khawm tawhin, chu'ng zinga 933 chu show case hrang hrang 107-ah pho chhuah a ni a, a bak zawng chu reserve collection-ah dah a ni. Tribal Museum, Ranchi, Bhopal Museum leh Silpigram Museum-ahte objects eng emaw zat pe (donate) tawh.
Mizoram State Museum hi ni bika a thlawna en theiha an hawn tih lohah chuan en man a ngai a, entry fee chu puitling pakhat tan Rs. 20 leh naupang pakhat tan Rs. 10 a ni. Sikul naupang, zirtirtute hruaia educational trip-a kalte chu 50% concession pek an ni a; kum 65 chung lamte tan en man chawi a ngai lo. Ram dang mi (foreigner) tan entry fee Rs. 50 lak a ni bawk.