Plastic Road (Green Road) siam zo

Mizoram PWD leh Save Chite Lui Coordination Committee (SCLCC)-te'n sarâng (polythene) paih tawh an chhar khawm leh hmanga Reieka kawng an siam, Plastic Road (Green Road) tia an vuah chu June 5, Zirtawpni khan siam zawh a ni a; metre 800-a thui, metre 5.50-a zau a ni.

PWD leh SCLCC-te hian kum 2018 aṭang khan polythene hman hnu Chite luia lutte chu ram danga an tih dan entawnin kawng siamna atan ṭangkai zawka hman dan tur an ngaihtuah a, kawng siam nan hman turin an ruahman a ni. Plastic Road (Green Road) siamna atan hian Reiek khaw chhung aṭanga Tourist Resort inkar kawngpui chu an thlang a, kum khat chuang siam a nih hnuah June 5, World Environment Day khan an siam zo ta a ni.

Plastic hman hnu hmanga kawngpui siam hi Indian Road Congress-in hmantlak, ṭha leh him tia a pawm tawh a ni a, Mi­nistry of Environment, Forests & Climate Change pawhin uar turin state tin a lo hriattir tawh. Mizoramah pawh lian tham zawkin hmun danga kalpui zui zel dan tur pawh ngaihtuah mek a ni bawk.