Hmunphiah chíngtute ngaihthahah Duhoma'n Mizoram sorkar a puh

ZNP president Lal­duhoma chuan, hmun­phiah chíngtute tana sorkar laipuiin sum a pek chhuah tawh, Mizoram sorkarin a hrên khawtlai vangin mi tam takin harsatna an tâwk niin a sawi a; Mizoram sorkar chu hmunphiah chíngtute ngaihthahah a puh.

Nimina ZNP pisaa inkhawmah Lalduhoma'n thu sawiin, sorkar lai-puia Ministry of Tribal Affairs-in Mizoram State Agriculture, Horticulture and Marketing Co-opera­tive Federation (MAHFED) Ltd. dil angin hmunphiah leina tur Februa­ry 18, 2017 thleng khan Rs. 1,74,00,000 a rawn pe niin a sawi.

Lalduhoma chuan, Central-in Rs. 1,74,00,000 a rawn pek chu Mizoram sorkar kaltlanga pek chhuah a ngaih avangin Mizoram sorkarin a hréng khawtlai niin a sawi a, "A hun takah hmunphiah chíngtute’n an thawh rah an hralh theih loh phah a ni. Hmunphiah chíngtute an mangang a, a man tláwmin Bagha vai hnenah ṭhahnem tak an hralh hman a, MAHFED hian a tam zawk an lei thei ta lo a ni," a ti.

Kuminah hmunphiah chíngtute’n harsatna an tâwk nasa hle tih sawiin Duhoma chuan, "Kan lainat tak zet a, leilunga eizawng 70%-te mittui a tla mek a, kum tin kha leh chen an lo hlawhchham tawh a ni," a ti a; ṭangtal pawl, Zoram Peoples Move­ment (ZPM) an sor­kar chuan budget-ah sum dah a nih dawn thu a sawi.