Maxicab-te permit titawp turin Tlabung khawtlangin sorkara thlen an rel

Tlabung khuaa V/C leh tlawmngai pawl hrang hrang hruaitute chuan, sorkar thu leh khawtlang hruaitute ngenna zâwm loa maxicab-te tun thlenga service duh loa an la ding chhunzawm chu an dem thu an puang a; maxicab tlan duh lote chu an permit titawp tura sorkara thlen an rêl.

Tlabung V/C-te leh NGO hrang hrang hruaitute chu February 17, Inrinni khan Tlabung V/C House-ah an ṭhukhawm a, maxicab chuan man tihsan phûtna nghawng kal zela Tlabunga maxicab-te chawlhkar khat chhung an din tawh chungchang an ngaihtuah, Meeting hi Tlabung Zodin V/C president PC Biakzuala'n a kaihruai.

Khawtlang hruaitute kalkhawm chuan, Tlabunga maxicab-te'n Mizoram hmun danga maxicab chuan man aia sang an hmang tawh chunga chuan man tihsan an tum chu pawi an tih thu an tarlang a; sorkar ngenna pawh zah loa tun thlenga an la tlan duh lo chu an dem thu an puang.

Tlabung V/C leh NGO hruaitute chuan, tuna maxicab service-te lungawi lohna chuan mipui harsatna a siam thu te, maxicab service tur lei duh mi tam tak ei zawnna a dâla an hriat thu te an sawi a; mipui harsatna sutkian thuai a nih theih nan an permit chhuhsak tura thuneitute hnena zualko an rêl a ni.

Tlabung aṭanga thu dawn danin, Tlabung Maxicab Welfare Asso­ciation chuan maxicab chuan man tihsan an duh a, mahse, khawtlang hruaitute'n an dodal thung a; maxicab neitute chu an lungawi loh avangin February 5, 2018 aṭangin maxicab-te an tlântir lo a ni.

Maxicab-te hian Tlabung leh Lunglei inkar chuan man chu Rs. 300 aṭangin Rs. 350-ah tihsan an tum a; Tlabung khawtlang hruaitute erawh chuan, Rs. 350 a nih chuan, km. khat chuan man Rs. 3.70 vel a nih dawn avangin Mizoram hmun danga maxicab chuan man aiin a sang fâl hle dawn niin an sawi thung.