CM Rural Housing Scheme sawiho

Chief Minister Rural Housing Scheme dawng tur (beneficiary)-te thlang tura din Lunglei District Level Selection Committee chu nimin khan SDO(S) H Lalrinpuia hoin DC conference hall-ah an ṭhukhawm.

H Lalrinpuia chuan, CM Rural Housing Scheme chu New Economic Development Policy (NEDP) hnuaia mi harsate dinhmun chawikâng tura hmalakna pawimawh tak a nih thu sawiin, "Scheme-in a tum ber chu thing­tlang khuaa cheng, in nei lote tana in thar sak leh kutcha ina khawsate in thuam ṭhat a ni," a ti a; a phu ngeite'n ṭanpuina an dawn theih nan Gram Sabha kal­tlangin dik taka beneficiary thlan a nih tur thu a sawi.

Lungleia DRDA project director K Lalrohlua chuan, CM Rural Housing Scheme chu thingtlanga chengte hmasawnna leh hamṭhatna tura sorkarin a duan a nih thu a sawi a, "Dik taka beneficiary thlan an nih theih nan block tinah BDO kaihhruaina hnuai­ah Block Rural Housing Committee (BRHC) din a ni. Beneficiary thlan chhuah chu dik leh felfai taka kalpui tum a ni a, Lunglei district chhungah beneficiary chhungkaw 619 thlan a ni ang," a ti.

CM Rural Housing Scheme hi NEDP hnuaia hmalakna a ni a; tun dinhmunah scheme kaltlang hian Mizorama district panga - Champhai, Lung­lei, Kolasib, Mamit leh Aizawlahte in 2,000 sak tum niin, beneficiary-te'n in sak nan Rs. 50,000 ṭheuh an dawng dawn a ni.