Mizoramah COVID-19 vei la hmu lo Rinhlelh mi 153 khung hran an ni tawh
Health & Family Welfare department tarlan danin, Coronavirus (COVID-19) kai Mizoramah hmuh an la awm lo a; chutih rualin, kai palh theia ngaih rinhlelh mi 153 dah hran an ni tawh. COVID-19 chungchangah hian Mizoram sorkar chuan mipui hnena thuràwn a tichhuak thar.
Health department tarlan danin, nimin thlenga Mizorama COVID-19 vei palh theia ngaih khung hran tawh mi 146-te chu mahni ina inkhung (home quarantine) an ni a; chu'ng zinga mi pariatte chuan inkhung hran hun an hmang zo tawh. Nimin khan mi pasarih dang khung hran an awm leh avangin khung hran zat chu 153 a tling ta a ni.
Enfiahna hmun (screening point) hrang hrangah nimin thleng khan mi 38,039 enfiah an ni tawh a, chu'ng zinga mi 4,465 chu nimina enfiah an ni. COVID-19 kai leh kai loh finfiah turin nimin khan mi pakhat sample chu testing centre-ah thawn a ni a, a hmaa thawn tawhte nen nimin thleng khan mi pasarih sample thawn a ni tawh.
Hetih lai hian, Mizoramah Coronavirus vei hmuh chhuah a la ni lo a, damdawi-ina dah an la awm lo bawk. Health department chuan, khawvel hmun hrang hranga COVID-19 léng mek lakah Mizoram mipui himna turin Mizoram páwn
aṭanga Mizorama lut, a bikin hri lènna hmun aṭanga lutte mahni in lamah inkhung rih turin a hriattir a ni. Novel Coronavirus hri léng lakah mipui vantlang himna turin Mizoram sorkar chuan thurâwn a tichhuak a; khawsik, hritlang, khuh leh hrawk na tel, thâwkna lama harsatna neite chu sikul, college, bazar, biak-in leh puipunna hmuna kal lo a, mahni in emaw, damdawi-inah emaw inenkawl turin an chah.
Loh theih loha zin chhuak tan
# Taksa hriselna ven uluk hle tur
# Mipui vantlang puipunna lam reng rengah kal loh tur
# Loh theih loha mi dang biak a ngaih pawhin inhnaihchilh taka awm loh tur
# Zinnaah kut silna remchang a awm loh pawhin hand sanitizer pài a, a khát tâwka hman ṭhin tur
# Hritlang, khuh leh khawsik chuan hmai tuamna (mask) hman tur
# Mit, hnár leh káte khawih tam loh tur
# Kut láwngin mi dangte nena inkhawih ṭâwm theih chi hrang hrang khawih loh tur. Khawih loh theih loh a nih chuan tissue paper hman tur
State páwn aṬanga zin lo haw tan
# COVID-19 lènna ram aṭanga hawte chu ni 14 chhung mahni inah inkhung (home quarantine) tur.
# Khawsik, hritlang/khuh, thâwk lama harsatna neite chuan a rang thei ang berin helpline no. 102 (toll free), 0389-2323336, 0389-2318336-ah inhriattir tur, eng lai pawhin biak theih a ni
# Hritlang, khuh, khawsik nei chuan mask hman tur a ni a, mi dang lakah inthiarfihlim tur