MJA leh Miss Mizoram top 6-te an inkâwm

Miss Mizoram 2020 Top 6-te leh phai lama modelling agency leh company-in model atana an thlante chu Miss Mizoram neitu Mizoram Journalists' Association (MJA) member-te nen nimin khan Aizawl Press Club-ah an inkâwm.

Inkawmnaah hian MJA president Zonunsanga Khiangte chuan, MJA leh ZONET Cable TV-in Miss Mizoram 2020 thlanna tluang taka an buatsaih zo thei chu lawmawm a tih thu sawiin, miss thlan chu ṭul tih lohna awm thei mah se, ṭhenkhat tan eizawnna kawng thar bul ṭanna siamsaktu a nih thu leh, tun ṭumah pawh modelling lama kal tur thlan an awm nghal thu a sawi.

Zonunsanga Khiang­te chuan fuihna thu sawiin, "In chungah mi mit a fu leh zual tawh dawn a, nungchang leh mi dawnsawn dan thlengin mahni tlin chin chinah mi fak hlawh zui zel tura ṭan in lak kan beisei a ni," a ti.

Inkawmhonaah hian MJA-in Miss Mizoram huaihawt a chawlh lailâwk laia Miss Mizoram thlan huaihawt zuitu C Dinthanga, editor, Lelte Weekly hnenah Miss Mizoram Organi­sing Committee-in chawimawina thuziak a pek chu MJA President-in a hlan a ni.

Miss Mizoram 2020 Zirsangpuii pawhin thu sawiin, MJA-in Miss Mizoram huaihawt bul an lo ṭan chu ropui a tih thu a sawi a, "Hmeichhiate dinhmun chawisangtu in ni," a ti. Miss thlanna neih chhunga an tawnhriat leh zirtirna an dawn hrang hrangte aṭangin amah leh contestant dangte'n a ṭha zawngin hmasawnna an neih phah ngei a rin thu a sawi bawk. MJA hian Miss Mizoram 2020 top 6 leh model atana thlan pa­hnih, an vaiin mi pariat hnenah lawmpuina thilpek an hlan a ni.