Quarantine facility hrang hrangah Swab sample lain thawk chhuak

Chief medical officer (CMO) - Aizawl East leh Aizawl West district-a thawk te, Zoram Medical College (ZMC) leh Mobile Medical Unit (MMU) hnuai­a thawk doctor, nurse, laboratory technician, health worker leh cold chain enkawltute chu June 6, Inrinni khan quarantine facility hrang hranga awmte swab sample lain an thawk chhuak a; endik turin mi eng emaw zat sample an la.

State Field Laboratory Unit (SFLU) hmalaknaa swab sample la tura tirh chhuah mi 30-te chu an kal chhuah hmain Health Services directorate conference hall-ah koh khawm an ni a; SFLU leader Dr Pachuau Lalmal­sawma, state no­dal officer, IDSP-in thil pawimawhte a hrilhfiah hmasa a ni. Infuihtharna thu an sawi rual bawk.

Thawktu mi 30-te chu team pasa­rihah an inṭhen a, sorkarin a siam qua­rantine facility leh khaw­tlang ruahman community quarantine facility-a awm mekte swab sample an la a; sample an lakte chu ZMC Covid-19 Labo­ratory-ah endik a ni ang.

Inrinnia sample an laknate chu Se­venth Day Tlang, Kanan Veng, Chawnpui, Chawnpui Vengthlang, Tanhril, Chawlhhmun, Dawrpui Vengthar, Chaltlang, Ramhlun North, Ramhlun South, Hunthar Veng, Edenthar Veng, Bawngkawn, Chhinga Veng, Armed Veng leh Electric Venga quarantine facility leh community quarantine facility-a awmte an ni a; an la kal lohnaah kal zel an tum bawk a ni.