Mizoram-Assam ramri chungchang sawiho : Inner Line Reserve Forest La let tura hmalak an rel

MZP chuan nimin khan an Pisapuia confe­rence hall-ah Mizoram leh Assam state ramri chungchang zirhona an buatsaih a; political party leh tlawmngai pawl hrang hrang aiawhte an tel.

Seminar hi MZP vice president B Vanlaltána'n a kaihruai a; Joint Action Committee in Inner Line Reserve Forest Demand Mizoram (JAC on ILRF­DM) chairman F Ngurbiakvela'n paper a buatsaih a sawi. Bairabi khuaa MZP-in Zofate Chawlhbûk an sakna atana ram petu Lalrothangi w/o Ch. Chhunga (L), Ex-Chief Minister, Saron Veng hnenah lawmthu sawina thuziak an hlan bawk.

Thu sawitu L Ram­dinliana Renthlei, MZP president chuan, tuna Mizoram chin nia ngaih zawng zawngte neih lêt vek duh tawh lo zawk ang leh Mizote'n an luah sêng chuang lo anga ngaihdan awm ṭhin chu ṭha lo an tih thu a sawi a, "Kan ram a nih chuan a enkawl dan tur leh a tih dan tur chu a ram neitute'n kan rêl ve ang," a ti.

Seminar-ah hian political party - Congress, MNF, MPC, ZNP, BJP, ZPM leh PRISM aiawh te, tlawmngai pawl aiawhte an tel a; sawihona hun ṭha tak hman niin, resolution an pass nghal a ni.

Resolution
1. Inner Line Forest Reserve sq.mile 509, Assam sor­karin a enkawl mek hi Mizoram sorkarin a enkawl ve tawh a, lak let a nih theih nan hmalak ni rawh se.

2. Kan pi leh pute aṭanga kan rochun kan ram hi humhim a, humhalh tlat a nih theih nan hmalak ni se la, kan ram humhalh leh humhima hma kan laknaah pawl leh political party-te ṭan rual tlat ṭhin ni rawh se.