Mizoram State Day hi Mizote Min tipumkhattu ni se - HM Zira

Home minister R Lalzirliana chuan, Mizoram State Day, February 20 chu Mizote tipumkhat leh zualtu ni se a duh thu a sawi a, "Kan ngaihtuahna hian ramri a pelh a, state páwna Zo hnahthlak awmte nen unau vek kan ni tih hriat a pawimawh," a ti.

Thuthar thehdarhtu ṭhenkhatte'n an kawmnaah Home Minister chuan, state a nih hnuah Mizoramah chhiatrupna rapthlak lutuk a thleng lo chu lawmawm a tih thu sawiin, "India rama state naupang pawl kan ni chungin ram nuam leh mi dang pawhin an tlawh châk kan ni thei hi a lawmawm hle. Hetiang kan nih theihna chhan chu mipuite vang a ni," a ti a; Zo hnahthlak zawng zawngte State Day chibai a bûk.

R Lalzirliana chuan, Mizoram chu ram ṭha tak, thlai leh thei ṭhat duhna hmun a nih thu sawiin, "Eng pawh thawk ila, tih tak taka kan tih chuan eizawnna tlak a ni. Rinawmna leh taimakna nen kan ram tan hian theihtawp i chhuah ang u. He ramah hian inngeih tlang taka kan awm a pawimawh," a ti.

Mizote chu insawisel chíng tak an nia sawiin Lalzirliana chuan, "Hei hian ṭhatna chin a nei ve thoin ka hria. Mihring kan ni a, sawisel bo leh fel famkim kan awm lo. Kan insawiselnate ṭhatpuina atan kan hman phawt chuan thil ṭha tak a ni ang," a ti a; chutih rualin, insawiselnate chu huatah la ngawt lo a, insiamṭhatna atan hman ṭhin ni se a duh thu a sawi.

Home Minister chuan, eptute'n sorkarna siamtute an duhkhawp ṭhin loh thu sawiin, "Tu pawhin sorkarna siam se, hmasawnna hna thawh kawngah kan induhkhawp lo ṭhin. Hei hi a ṭhatna chin a awm a, sorkarna changtute an ṭang a, kan ramin hmasawnna kawng a zawh phah a ni. Sawiselna a awm loh chuan mihring kan insiamṭha thei ṭhin lo," a ti.

June 30, 1986-a India sorkar leh MNF-te'n inremna tluantling an ziah hnuah Mizoram chu state puitlinga hlangkai turin ruahmanna siam a ni a; August 7, 1986-ah state puitlinga Mizoram hlankaina tur bill chu Lok Sabha ah pharh niin, an pass a, member 310 zinga 308-in an thlawp a ni. Rajya Sabha-ah pawh member 171 zinga 160-in thlawpin an pass leh a; August 14, 1986-a India President-in hming a ziah hnan hnuah 53rd Constitution (Amendment) hnuaiah Mizoram chu India rama state 23-na a ni ta a ni.

February 20, 1987 Zir­tawpni-ah India prime minister, Rajiv Gandhi chu Mizoramah lo kalin, zing dar 9:30-ah Lammuala mipui tam tak kalkhawmte hmaah Mizoram state nihna chu a puang a; Rajiv Gandhi chuan, Mizoramin remna leh muanna a neih avang leh state a neih tak avanga a lawmpui thu a sawi.

February 20-ah hian Raj Niwas-ah Mizoram Lt. Governor ni lai chu Gauhati High Court chief justice-in Mizoram Governor atan rinawmna thu tiamtirin a la lut a; chief minister atan Laldenga bakah, minister atan Zoramthanga, Rualchhina leh Tawnluia te rinawmna thu tiamtira lak luh an ni.

Mizoram State Day pual hian prime minister Narendra Modi chuan a twitter-ah Mizo mipuite duhsakna a hlan a, "Mizoram hi hmasawnna kawng a zawhna lamah duhsakna ka hlan a ni," a ti.