KHAWTHLIR

Medical camp
Rotary Club of Aizawl, Narayan Hospital, Kolkata leh Adventist Hospital, Aizawl-te ṭangkawp chuan February 19, Thawhṭanni khan Adventist Hospital-ah free medical camp an buatsaih a, mi 200 chuang an inentir. Free medical camp atan hian state páwn aṭangin doctor eng emaw zat an lo kal a ni.

NEDP tour
NEDP hnuaiah Serchhip district MJA member pariat leh Serchhip IPRO K Saitluanga te chuan khaw chhak tlangdunga pi leh pute sûlhnu fang tur nimin khan Serchhip an chhuahsan a, February 23-ah Serchhipah an let leh ang.

MLA-in enfiah
Chalfilh bialtu MLA Dr Ngurdingliana chuan February 19, Thawhṭanni khan Tuirini lei chim chu a hmunah kalin a enfiah a, lei chim vanga thi HC Lalfakzuala, Sesawng chhungte a rál nghal. Dr Ngurdingliana chuan, Tuirini lei chima chhiatna thleng chu politics-a inchirhthehna atan tumahin hmang lo se a duh thu sawiin, social media velah hna thawkte rilru tihnual thei zawnga ṭawngkam hmang lo turin mipui a chah.

Kuhva chîn zirtir
Kolasib district-a Ṭialte Zaua kuhva chingtute tan Kolasib KVK chuan nimin khan Kawnpui YMA community hall-ah training an buatsaih a, Agriculture director RL Thanzuala'n a hmanpui. Training-ah hian kuhva chíngtu mi 30 chuang an tel a, KVK scientist-te'n kuhva chin dan leh enkawl dan an zirtir a ni.

Thubuai siamsak
Anti Corruption Bureau (ACB) chuan tun hnai khan Mara Autonomous District Council sorkar hnuaia LAD-a assistant engineer K Hlosa chu Rs. 1,31,925.60 tihchingpen chungchangah thubuai an siamsak.

Hospital parking
Aizawl Civil Hospital chuan, Trauma Center sakna tur hmun awl remchangah public parking an siam thar. Damdawi-in hotute chuan, damlo kan turte chu hospital compound-a tlan lut kher loin, public parking an siam tharah motor dah ṭhin turin an ngen a ni.