Champhaiah 'Zomi Nam Ni' hman a ni

Zomi Cultural Society (ZCS), Mizoram buatsaihin nimin khan Champhai Vengthar community hall-ah Zomite ni pawimawh, 'Zomi Nam Ni' hman a ni a, minister H Rohluna'n a hmanpui.

H Rohluna chuan, Zomi Nam Ni chu Zomi hmun hrang hranga awmte’n kum tin ropui taka an hman ṭhin thu a sawi a, "Zo hnahthlakte hi ṭawng leh tih dan phungte dang deuh ṭhin mah ila, lak hran tak tak theih kan ni lo. Tu pawh hi inla hrang thei kan ni lo a, inpumkhatna hi kan ngai pawimawh tur a ni," a ti.

Mizoram sorkarin Zo hnah­thlak hmun danga awmte hma­khua a ngaih pawimawh thu sawiin H Rohluna chuan, "Chief Minister ngei pawhin Myanmar ram chhunga Zo hnahthlakte a hmun ngeia kalin a tlawh tawh a, an harsatna leh mamawhte sorkar laipui hnenah a thlen tawh," a ti a; pipute aṭanga kan tih dante chu chawi nun zel a pawimawh thu leh Kristianna nena inkalh loa kal a ṭul thu a sawi.

H Rohluna chuan, sorkar hmalakna, Act East Policy hnuaiah border trade leh land custom station-te kalpui a nih thu sawiin, "Mihring lam kan inunau a, kan inlungrual phawt chuan hlawhtlinna a awm ngei ang. Inkalpawhna leh insumdawn tawnna ṭha zawk awm theih nan border area khuaahte border haat din turin sorkar laipuiah bawhzui zel a ni," a ti.

ZCS president Nangsianmung pawhin thu sawiin, "Zomi Nam tih hnam hming hi Rev. ST Haugo-in Zomi Baptist Church Convention, Hakha, Chin state-ah kum 1953-ah a phuah thu a sawi. He hunah hian kan thlahtu chu ‘Zo’ a ni a, keini hi ‘Zomi’ te kan ni, tia a sawi chu palai kal zawng zawngin lungrual takin an pawm vek a ni," a ti a; Zomi tih hnam hming chu Zomi Labour Corps palai pakuate'n kum 1914 velah King George-V bulah pawh Zomi hnam kan ni tiin an lo thlen tawh niin a sawi.

YMA sub-headquarters, Cham­phai president C Lalbiak­zauva pawhin thu sawiin, "Zo hnahthlak hnam hrang hrangte hi Zoram neitu vek kan ni a, culture leh tih dan phung inang nei kan ni. Hun kal tawha chibil inthliarna, indona leh innghirghona lo awm ṭhin tawhte chu hnualsuat a, ṭan rual a ngai. Hnam ziaráng leh ṭawngte vawng nun tlat a pawimawh," a ti.

Zomi Nam Ni hmanna hi February 19, Thawhṭanni zan khan ṭan a ni a, nimin chawhma khan ‘Zolai gelhdan’ (Zomite ziah dan) tih thupuia hmangin seminar neih a ni a, chawhnu lamah hruaitu thar an thlang.