Mizoram Youth Commission bul tumin Aizawlah Jet Airways cabin crew la dawn
Mizoram Youth Commission (MYC) leh Jet Airways-te chuan March 27, 2018 khian Aizawla MYC pisaah Jet Airways cabin crew tur lakna an buatsaih leh dawn.
Jet Airways cabin crew tur lak tur chungchangah hian MYC chairman Joseph Lalhimpuia, MLA chuan, a hmain MYC-in inbuatsaihna a kalpui dawn thu a sawi a, "MYC-in Language and Aviation Training kan buatsaih tur hi a ṭha thei ang bera kalpui kan tum avangin Mizoram ṭhalaite'n seat pawh rawn inchuh hial tlak turah kan ngai,” a ti.
Joseph Lalhimpuia sawi danin, Jet Airways an cabin crew tur Aizawla lakna an neih tura inbuatsaih lâwkna atan MYC-in February 26 aṭanga March 26 thleng MYC training hall-ah a thlawnin Grooming/Pre-Recruitment Training Language and Aviation Training an buatsaih dawn. Training-ah hian seat 150 a awm dawn a, a kal hmasa sa ziah luh an ni ang. February 21-24 inkarah registration tih tur a ni.
Jet Airways cabin crew ni tur hian kum 18-27 inkâr, mipa ft. 5'7" aia hniam lo leh hmeichhia ft. 5'2" aia hniam lo, HSSLC leh a chung lam pass, nupui/pasal la nei lo tan dil theih a ni a; pian ṭha, hmêl hmuh nuam, hmai mám ṭha, hmaia arngêng hnuhmá leh ser awm lo, tattoo nei lo, mit ṭha pângngai, mi biangbiak thiam an duh ṭhin.
MYC hian hun eng emaw ti aṭangin Jet Airways leh Spicejet nen thawkhoin, Mizoram ṭhalaite tan cabin crew leh ground staff lakna an lo nei tawh ṭhin a; MYC-in a buaipui hnuah kum 2014 aṭanga 2017 thleng khan Mizote cabin crew-ah mi 30 leh ground staff mi pali an lut tawh a ni.