Champhai leiletah in sak khap

Champhai DC Vanlalngaih­saka chuan thupek chhuahin, Champhai leilet chu huan siamna atan ni loa hman a khap a, in sa mekte chu chawlhsan nghal turin a hriattir.

Champhai DC tarlan danin, sorkar notification No. LRR-80/73 (A) Dt. 14 April, 1989-in Champhai town (khawpui)-a a puan angin phaizawl leilet hmun chu khawpui huam chhungah telh a ni lo. Khawpui huam chhung sorkarin a puan ni loa chenna tur in sak leh kudam leh thil dang atana in sakte phal a nih lo.

The Mizoram Revenue Laws 10(6) leh 11(1)-in an sawi leh tarlan, agricultural LSC, periodic patta leh garden pass-te chu pass pek a nihna ang taka agriculture (huan/thlai siam, etc) atan ni loa thil dang atana hman khap tlat a ni.

Champhai leileta agriculture kaihhnawih atana ram neite'n pek an nih chhan ang takin an hmang tur a nih thu tarlangin Champhai DC chuan, "Kudam sak leh chenna atana in sakte khap tlat a ni. Kudam sak mek leh sak tawhte endikin ram pek an nih chhan anga hmang lote chu Mizoram Revenue dan 11(8) tlawhchhanin ṭhiat tura hriattir vek an ni a, sa mekte pawh chawlhsan nghal tura hriattir an ni," a ti.

DC thupek chuan, khapna thu­pek awih loa ti luite chu pawisa chawitir emaw, an pass tihtawp (cancel) sak thlenga hrem theih an nih thu a puang bawk.