COVID-19 laka Mizoram a himna tura Health Minister hmalakna MNF-in an fak

MNF chuan thuchhuah siamin, COVID-19 laka Mizoram a him theihna tura Health minister Dr R Lalthangliana hmalakna chhuanawm an tih thu an tarlang a, "A tìr tê aṭangin a theih ang angin hma a la nghal char char a ni," an ti.

MNF chuan, ram dang leh state dang aṭanga khualzin lut chhuakte luhkapui ber Lengpui Airport, damdawi-in hrang hrang leh international boundary-ahte endikna siam a ni a, state dang nena inkalpawhnaahte medical duty dahin endik ṭhin a nih thu an tarlang a, "Health Minister hian a hmun ngeiah vawi duai lo kal chilh­in thawktute dinhmun a enfiah a ni," an ti a; hri léng mek chu mutmawh hnàrmawhah neiin a kal chilh zel niin an tarlang.

Chief Minister hoin minister zawng zawng an ṭhukhawm a, sorkar department hrang hrang bakah, kohhran leh NGO hrang hrangte thawhpuiah sáwmin vawi duai lo Health Minister-in COVID laka himna turin meeting a ko tawh tih sawiin MNF chuan, "Health department-a thawkte hnenah fimkhur tur leh ṭang ruala theihtawp chhuaha hma la tura thuchah ziaka a semte hi a remhria tih loh rual a ni lo," an ti a; Health Minister chuan Mizo mipui tan thlamuanpui khawpin hma a la niin an sawi.

MNF chuan, mi tam takin an nghahhlelh em em COVID-19 endikna kháwl lei turin Mizoram sorkar a inpeih tawh nia an sawi rualin, khâwl chu awlsam taka lei mai theih a ni lo niin an sawi a, "Hmarchhak pumpui inṭâwm theih turin sorkar laipui pawhin tun hnai maiah khan Guwahati-ah kháwl pakhat a rawn dah thei chauh a ni. Medical college leh university hlun tawhte pawhin an la nei lo vek zawk. Hetih lai hian, Mizoram sorkar chuan neih ngei tumin hma a la mek a ni," an ti.