Chhung tinin eizawnna ngêlnghet an neih theihna atan kan thawk ang - Dr Thangtea

MNF vice president Dr R Lal­thang­liana chuan, MNF party-in sorkarna an chan chuan chhung tinin eizawnna ngêlnghet an neih theihna atan hna an thawh tur thu a sawi.

Tuikum MNF Block-in nimina Ngentiang khuaa inkhawmpui an neih a hmanpuinaah Dr R Lalthangliana chuan, "Congress-in NLUP tlemtê têa an sem ang ni loin, chhung tinte'n eizawnna ngêlnghet an neih theih ngei ngeina turin hna kan thawk dawn. SEDP hian kawngpui ṭha, hriselna, zirna leh vantlang nun himnate a huam vek. SEDP-a kan indâwm kân dan tur chu a bul ṭansak a, a tawp kharsak a ni dawn. Congress hun a tawp a, MNF kan sorkar ngei dawn a ni," a ti.

MNF Vice President chuan, October 22, 1961-ah mi 10 pawh tling loten 'Keini erawh chuan Lalpa Pathian hming kan lam zawk tur a ni,' tiin MNF an din tih sawiin, "Pathian kan dah hmasa ber a, a dawtah ram kan dah pawimawh leh a ni. Kan sorkar lai khan thil ṭha sawi sen loh kan thawk a, sorkar building tam tak kan sa thar a, sorkar hna thar tam tak kan la bawk a, hlawh lak theih loh a awm ve lo," a ti a; Congress-in police batallion khat pawh an lak theih loh laiin batallion pali an lak thar thu a sawi.

Bialtu MLA Lalrinawma pawhin thu sawiin, 'Sem sem dam dam, ei bil thi thi' tih chu an thupui a nih angin, party ringawt an invulh thei lo tih a sawi a, "Kan sorkar chuan SEDP hmangin hna tam tak kan thawk dawn. MNF hun laia tih chhuah Congress-in Health Care Scheme an kalpui mumal lo lutuk leh a chhawrnahawm ta lo lutukte hi kan ennawn ang a, kan sorkar hunah mipui tan changtlung leh felfai ṭha zawkin kan kalpui ang," a ti.

Tuikum MNF Block in­khawmpui hian MNF president Zoramthanga kaihhruaina an rin thu te, kumin inthlanah MNF a sorkar ngei an beisei thu te, Congress sorkara hotupa berin Pathian nung a tih leh an inkar chu lei a chim reng ang maiin a chim ta nia an rin thute leh, bialtu MLA Lalrinawma chu Best Legislator Award a dawn vanga an chhuan thutte resolution siamin an tarlang.