ZMC building a huna sak zawh loh Sorkar inthlahdah vangah ngai

ZPM ṭhalaite chuan thuchhuah siamin, State Referral Hospital leh Zoram Medical College (ZMC) building sak zawh hun tura sak zawh hman a ni lo chu sorkar inthlahdah vanga an ngaih thu an tarlang.

ZPM ṭhalai hruaitute chuan March 16, Thawhṭanni khan ZMC tlawhin, ZMC building thar tur (teaching block) sak mek leh State Referral Hospital sak zawm mekte an enfiah a; in satu engineer-te kawm­in, in sak dan leh zawh hun turte an zawtfiah a ni.

Engineer-te sawi dan­in, ZMC leh State Referral Hospital-a in sak belhte chu HSCC (India) Limited-in an khawih a; teaching block chu August 8, 2018-ah sak ṭan niin, cheng vbc. 60 vel sênga thla 24 (kum hnih) chhunga sak zawh tur a ni. Hospital sak zawm hna chu July 4, 2018-ah ṭan a ni a, cheng vbc. 43 vel hmangin thla 15 chhunga sak zawh tur a ni thung. ZPM ṭhalai chuan, damdawi-in sak zawm chu zawh hun tiam a pelh daih tawh hnu pawha hna thawh tur tam tak a la awm chu pawi an tih thu sawiin, "MNF sorkar hmasaa Referral Hospital sak dan leh sum hman dan mipuiin nasa taka an sawiselna zawng zawngte insiam ṭhat nan hmang loin, an tih dan ṭhin ngai têin damdawi-in sak hna an kalpui leh ta em ni?" an ti.