Tripura Zampui tlanga Bru dah tumna MZP-in theihtawpa dodal zel an tum

MZP hruaitute chuan Inrinni khan thuthar theh­darhtute an kâwm a; an president B Vanlaltána chuan, Tripura sorkarin an state chhunga Bru-te inbenbelna hmun atan Mizote awmna ram, Zampui tlang hman a tum chu an duh lo hle a, theih­tawpin an dodal dawn thu a sawi.

B Vanlaltana chuan, Mizoram aṭanga tlan chhuak Bru-te Tripura-a an awm hlenna tura sor­kar laipui, Tripura sorkar, Mizoram sorkar leh Bru pawl aiawhte'n January 16, 2020-a thuthlung an ziak chu lawmawm an tih thu a sawi a, "Chutih laiin, Tripura sorkarin Tuikukte inbenbelna atan Mizote ram Zampui tlang hman a tum hi kan duh lo a, Zampui tlanga Tuikukte dah ngheh a nih lohna turin theihtawpin hma kan la zel dawn a ni," a ti.

Zampui tlangdunga Mizote awm khawmna khaw bula Bru-te dah loh chu Tripura state rálmuan zelna atan thil pawimawh a nih thu dawiin B Vanlaltána chuan, "Zampuia Zo fate nen inhnaih taka an awm tlàn hi hun lo kal zel tur atan thil ṭha aiin thil ṭha lo a hring chhuak zawk dawnin kan ngai a, Tuikuk tan pawh Zampui area-a an awm hi an hma lam hun atan a ṭha lo zawkin kan ngai," a ti. Bru-te chu Mizote bula awm duh lo an nih avangin Tripura-ah pawh Mizote bula awmtir loh chu an duhdan a nih thu a sawi.

MZP President tarlan danin, kum 1998-ah hmasang aṭanga Zo fate luah ram, Sibuta'n Darlalpuii sial anga a chhunna Sakhan tláng leh Mizo khaw pasarihte chu Bru-te avangin Mizote'n an chán tawh. Mizo khua - Sakhan Serhmun, Sakhan Tualsen, Upper Dosda, Satnala, Sakhan Tlangsang, Bancherra leh Lungthirek-te chu Mizote awmna ṭhin ni mah se, Bru-te'n an in leh lo chhuhsakin an lo ûm chhuak tawh a ni.