Sorkar hmalakna a beitham hle - MPCC

Mizoram Pradesh Congress Committee (MPCC) office bearer-te nimina Congress Bhavan-a ṭhukhawm chuan, Coronavirus laka Mizoram leh a mipui himna tura Mizoram sorkar hmalakna chu beitham hlea an hriat thu leh, sorkarin COVID-19 financial assistance a la puang lo chu mangan­thlak an tih thu an tarlang.

MPCC chuan, CO­VID-19 laka invènna turin India rama state hrang hrangin chak takin hma an la a, hri kai leh kai loh endikna hmanrua changtlung tak an nei fur tawh tih sawiin, "Mizoram sorkar chuan laboratory chu sawi loh, PCR analyser tak ngial pawh a la nei lo hi a lung­chhiatthlak hle. India hmarchhak state tênau zawkte hmalakna kan ûm pha lo hi a vanduaithlak a, Mizoram mipui dinhmun hlauhawm takah min dah ni-ah kan ngai," an ti.

Congress party chuan, "Chief Minister-in sum a vaibelchhe téla a beisei loh lam aṭanga a dawn thu a sawi laia CO­VID-19 financial assistance a la puang lo hian mipui min tirálkhèl zual hle a, COVID-19 darh zel laka kan him theihna tura khum tlemtê dah hran bak inpuahchahna mumal sorkarin a nei lo hi a manganthlak hle a ni," an ti a; district hospital-ah phei chuan inpuahchahna mumal sawi tur a awm lo tih an tarlang.

COVID-19 laka himna tura inpuahchahna chu zin veivâk paha ngaihtuah tâwkah Chief Minister-in a ngai nia a lan thu sawiin MPCC chuan, "A zinna hmun pakhatah kan Health Minister pawh a ṭul anga finance lama a mamawh lo dap rawk rawk tura a hriattir thu a sawi. Hripui laka sum leh paia kan inbuatsaihna tur zin veivah paha a sawi liam mai mai hi hriatthiam a harsa a ni," an ti.

MPCC chuan, Congress sorkar laiin MIMER an din tih sawiin, "Bungrua leh hmunhma ṭha kan rochun a, tih tur tlemtê an neih ve hmanhmawh takin ti se, inbuatsaihna ṭha zawkin kalpui se la. Inbuatsaihna ṭha mipuite'n kan hre duh tih hi kan sorkar hi hriattir kan duh a ni," an ti bawk. Congress party hian party hminga inkhawm reng reng leh VC/LC atana campaign-na tur programme zawng zawng an ṭhulh tih an puang a ni.