Ni hnih chhunga mi 563 endik zingah Covid-19 vei mi 12; vei lo mi 551

Zoram Medical College (ZMC) Covid-19 Laboratory-ah June 5, Zirtawpnia swab sample endik mi 302 zinga pahnihin Covid-19 hripui an vei a, mi dang 300 an fihlîm. Inrinnia sample 261 endikah hripui vei mi 10 an awm a, hripui laka fihlîm mi 251 an awm thung.

Zirtawpni leh Inrinnia endik zat hi mi 563 zinga mi 12-in hripui an vei a, mi 551 an fihlîm. Nimin khan mi 200 chuangte swab sample endik leh a ni a, nizan zanlai velah result chhuah beisei niin, he thu ziah lai hian hriat hman a ni lo.

State Referral Hospital (SRH)-ah June 6, Inrinni khan Covid-19 vei mi pahnih leh hripui vei rinhlelh thilah mi 11, an vaiin mi 13 dah luh an ni. Nimin khan Covid-19 vei mi pakhat leh hripui vei rinhlelh thilah mi pasarih dah luh leh an ni a; nimina dah luh zinga panga chu nimin vek khan an swab sample laka endik a ni a, pahnih erawh chu vawiinah endik a ni ang.

ZMC Covid-19 Laboratory-a hripui vei hmuh chhuah zat chu mi 33 an ni tawh a, chu'ng zinga mi 22 chu SRH-ah enkawl mek an ni. Lungleiah mi pahnih, Mamitah mi pasarih leh Lawngtlaiah pahnih enkawl an ni thung. SRH-a awm mek zinga pakhat chu uluk zawka enkawl a nih theih nan ICU-ah dah a ni a, ngaihtuahawm a ni lo a, hma a sâwn zel tih SRH-ZMC Covid-19 Bulletin chuan a tarlang.

SRH-ah hian mi 42 an awm mek a; ICU-ah mi pakhat a awm bakah, Isolation Ward-ah mi 21, Risk Ward-ah mi 11, Make Shift ICU/SARI Ward-ah mi pahnih, NICU-ah mi pakhat leh Holding Ward-ah mi paruk an awm a ni.

ZMC chuan district hrang hranga quarantine centre-a awm mek, swab sample endik tura tihte sample leh endik hun tur a ruahman a; district tina thuneitute chu sample line list (excel sheet) covid19zmc@gmail.com ah thawn turin an ngen a ni.